********”
الفجر يادوب
كان لسه مدوب أخر الليل
وبيهدي البرث بكفه الزين
أول مصابيح النور والخير
ويقول يا دليل
اجمد ما تخاف وانسى التهويل
ده المصرى شجاع
عمره ما بيخاف من أي جفاف
أو همه ف يوم أنياب الويل
وف لحظة ياناس
ظهرت دبابير وف أيدها سلاح
بتقول هنجور
على أي كمين جواه أبطال
وندمر كل عشوش الطير
ونسكت صوت
كل اللى يقول هنعيشها كفاح
زرعوا الألغام
حوالين البرث ف كل مكان
وده طبع الغدر وكل خسيس
بيحب يشوف دمع الأوطان
مع أول قَرصة من الدبور
لكمين البرث
ظهروا الأبطال
شايلين ف القلب كتاب الله
قالوا هنعيش ونموت أحرار
علشان أولادنا تعيش ف النور
وبلدنا تكون للكون أزهار
قالوا واقفين نحمي الملايين
مع منسي وخالد والشبراوى
أبو قلب حديد
وأحمد وصلاح
وأبوعلوة وخالد وعميرة
أبو عزم شديد
وسباعي وتايسون واللي معاه
وشهيدنا سعيد
بلقاء الله جل في علاه
وساعات بتفوت
والدعم اتأخر ع الأبطال
لكن وياهم فين ما يكونوا
دعم الله
ماهو أصل الحق تملي الحق
يكون وياه
والباطل لو هيعيش له يومين
بكرة هيموت والناس تنساه
بتعدى ساعات وساعات بتفوت
والموت مبسوط أنه عمال
يقطف بإيدين أبطال الجيش
رقب الكفار
أما الأبرار ف نعيم عايشين
مع خير رسول طه المختار
ف كمين البرث يامصرين
الطوب لو ينطق هيقول مين
بيضحي بروحه لجل تعيش
الناس ف أمان
ويقول لجميع المصريين
مين اللي عشان المال بيبيع
حرية بلده والأوطان
واحنا علشان بنحب الجيش
حالفين ما نعيش
غير لما نجيب حق الأحرار
ونشوف الليل عايش مرعوب
م الشمس اللي بتولد للكون
أجملها نهار
عاشوا الأبطال ف كمين البرث
وف كل كمين
بيطهر مصر من الأشرار
*********************
