قصيدة ( كنا عيلة )
شعر عامي
الإسم : محمد علي حسن عبد النبي
المحافظة: الجيزة
الدولة : جمهورية مصر العربية
الشهرة : محمد الشواف
رقم الموبايل و الواتس :
01020896221/01122934802
كان زمان
كنت فاكر كان زمان
ناس تحبك من مفيش
ناس بتتعلم تبان
أحلى واجمل في المكان
بيت يضمك بيت كبير
قلب بيساعك كتير
حضن أم وصُلب أب
كتف أخ معاك يعيش
قبل دوسَك ع الزرار
تلقى ألف إدين تِمِد
تلقى حيطة وضهر سد
الأمان كان ليل نهار
كنا بنشوف الوشوش
نعرف المحبوب بجد
مش ورا شاشة ورتوش
كله بالفلتر يرُد
فيس بيتسللي بمشاعر
واتس بشتايم يعاير
والأنستا الكل شايف
في الفضايح كله حاير
لما ابويا كان ياخدني
فجر أدن يالا يابني
ابتدي يومك بربك
ويا ربك يابني تبني
في الطريق الكل صاحي
يبتسم من غير رتوش
الكلام كان صح جدا
مش كلام يطلع فاشوش
أحلى لمة
كنا لما
نيجي نفطر نلقى حب
أحلى لمة
وأحلى ذمة
كنا أقرب نبض قلب
في الشوارع والبيوت
لما حد ف يوم يموت
كنا نجري عشان نعزي
كان في حزن وكان سكوت
ع النواصي في الحارات
لما تيجي ف يوم بنات
كنا نحرسهم بعيننا
من عيون البصاصين
من كلام المجرمين
كنا نحميهم بروحنا
من غشامة كدابين
كنا عيلة
كنا نفرح كل ليلة
لما حد ف يوم بينجح
لما بنت ف يوم بتفرح
في النجاح أو في الجواز
كنا عيلة
كنا ناكل في البليلة
من طبق واحد كمان
كنا بنحس بأمان
ع المذاكرة ف لمبة جاز
قلب جارنا كان بيحضن
قلب غيرنا كان سمانا
لما كان الوقت يدَّن
كله بيكَبَّر معانا
كنا أجمل م الشاشات
كنا بنداوي الآهات
آه من الأيام وآه
واللي أحلى الذكريات
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
