قصيدة : كنت فى سني . مسابقة الشعر العامى بقلم / محمد البدراوي فتوح الغتوري

كنت ف سني بحلم إني

أعيش مبسوط

وأعشق فني وأفرح أغنى

بعلو الصوت

كنت بنادي وأقول يابلادي

فداكي يا أمي لحد ما أموت

كنت صغير طولي قصير

كنت بعاني من التفكير

طول الوقت البال متحير

كنت بخاف من التغيير

كنت بنام والدمع ف عيني

وأبويا يجيني ويصحيني

عشان مبكيش

ياخذني ف حضنه ويدفيني

ويسأل مالك أقوله مفيش

يبدأ يحكي ويكلمني ويعلمني

إزاي هنعيش

إدعي وصلي واصبر يابني

إنت أكيد ليك لؤمة عيش

كان ويايا بيطمني

ويخليني أنام بشويش

وأصبح أسافر في الدنيا واعافر

ممكن أغير في الظروف

وأمسك فيها بسرعه ألاقيها

ترد عليا إستنى شوف

ألمح فيها حنان وأتاريها

دنيا يسكن فيها الخوف

وأبويا يموت

وف لحظه سكوت

دنيا ونبوت على اكتافي

والحِمل يزيد والنار بتقيد

وأنا بالتأكيد هكون وافي

وعشت حزين وبعد سنين

أخويا يموت شهيد ف كمين

والحمل أهو زاد فيلم بيتعاد

ولسه سواد في الدنيا وطين

الحزن ماضي معايا عقود

من غير شروط أو حتى شهود

أقسم لي إنه يكون معقود

والحبل بيننا يكون مشدود

إبني اللي كان أملي وخيري

راح مني بيربيه غيري

ومسيره يرجع آه ومسيري

أكون ف حضنه قبل ما اموت

الدنيا ف لحظه بتتغير

وتخون كل محبيها

والعمر لو طال ده قصير

بيصيب كل اللي عليها

أكيد لكل بدايه نهايه

ولكل قصه روايه وحكايه

وحكايتي في الدنيا مرايه

مكتوب عليها مفيش هروب