ط
الشعر والأدب

قصيدة : كيف أحبك ؟ للشاعر / رضا ابو الغيط

* كِيف أحبك ؟ *

***************

كِيف أحبك

يا اللى هجرك

خلى نبض القلب مات

كِيف أحبك

يا اللي ظُلمك

خلى عينى تبكى دم

والدموع بتقول آهات

كِيف أحبك

وانتى بحرك موجه عالى

تحت منه

ياما ماتت ذكريات

لسه فاكرة

انى واقف ف المحطة

ف انتظارك

وللا فاكرة

ان كان بينا ميعاد

قولى كيف الانتظار ؟

وسط نار من غير حنان

وللا كيف القلب يعشق

قلب معجون بالعناد؟

طبعه واخد ع البعاد

والشتات

كيف أحبك

يا اللى هجرك ليله طال

والسؤال

هو كيف القلب ليكي

مره مال ؟

وللا عيني

كان ضناها الإنشغال

وانتى بتبيعي الغرام

بالتراب والإغتراب

وانتي بتبيعي اللي حبك

لجل منقار الغراب

يا اللى حبيتى السراب

انتي عارفه بعتي ليه

مش عشان سواد عينيه

وللا كُرها ف العذاب

انتي فاهمة بعتي ليه

ولا فاكرة العقل غاب!!

يا يمامة بالسلامة

بكرة هيموت الغراب

لما نسر الشوق يحلق

ف السحاب

بكرة تِبكى لما تبقى

بس أرملة اللي شاب

يا يمامة العقل فاااااق

م النفاق و الزواق

من قلوب الوصف ليها

طينه غطاها الضباب

يا يمامة

اسمعينى من سُكات

حُبك إنتى من ساعتها

جوة قلبى الشهم مات

لسه فاكرة

انى واقف ف المحطة

ف انتظارك

قولنا سابق

يا يمامة القطر فات

افتحى شنطو إيديكى

وإقرى تانى جوابى ليكى

ده الجواب كان من سنين

مش مؤرخ من ساعات

ألف قطر وقطر فات

والحنان والذكريات

كله تحت القطر مات

والصوان اللى ف صدرى

نصبه ليكى

والدموع السايلة منى

خسارة فيكى

فاكرة نظرة زى سابق

راح تخلى القلب تانى

يحن ليكى ؟

دالنهاردة يوم عزاكى

يا اللى بعتى ف يوم هواكى

واشتريتي الإكتئاب

كيف أحبك

وإنتى شمسك

ساكنة دايما ف الغروب؟

كيف يآمن قلبى الأخضر

للجراد

يبقى حارس ع القلوب؟

كيف أحبك وإنتى

قتالة قلوب؟

يا يمامة صدقينى

حبك إنتى ف قلبى مات

واللي مات

مش مقدر ليه يعود

بالمحايلة والعياط

فإسمعينى وافهمينى

صعب جدا تقنعيني

ان بعد العيد هينفع

تفتل الكحك البنات

وان هاويتي تريحيني

فوتى قلبى .. من سُكات

********************

رضا أبو الغيط

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى