قصيدة .لا مو عَتبْ .. للشاعرة / د. وفاء عبد الرزاق .. العراق

بَسْ عَتْبْ الهوى اورودْ

اذا خان العطر

مامِشْ رجا بعودْ

عسَّلتْ الفرَحْ

يوم البِچَه البستانْ

عن لا يحزن الفلاَّح

و يگولْ الوكِتْ خانْ

لوَ جاع الهلا

لماعونَّه اندلّيه

ولوَ طاح الخَضَارْ

بطيبنه انعلّيه

لا مو عَتبْ

يا شِيمَة اللّگاحْ

يلحضنچ مودّة

وفيّچ اسْعودْ

مدَّيتْ ابئيدَيتي

وأعْرفْ الأعياد

بجيوب النخل

چكليتهن موجودْ

اعتبْ؟

بس مو عتبْ

هلجبته ويَّاي

گصْ الگيظ مَتني

وطاريكم افْياي

اطمّني بهواكم

واشوف بْعيدكمْ جاي

أشمَّنكم واگول

افَّيَشكمْ داي

لا مو عتبْ

جايه اعزف بعودْ

اشو دنّگْ خَجَلْ

من دوَزنتكم راي

خرسات الدفوف

اشبيچَن اشْصار؟

دمعَن مستحى

ومنّي استحى الناي

ولِكْ يَعتابْ بطّلْ

لا تِدِگ هلبابْ

ماعضّيت اصبْعَكْ

مُن ذيچ الوْعود؟

تِدريهمْ گُباحة

وتِعرفْ اجحُودْ.