لحظة ميلاد
****************
لسة القصيدة بتتولد
من فرط أحزان معضلة
والمشكلة
إن القصيدة ف مهدها
محتاجة حضن يضمها
وأنا زيها
محتاج لحضن يضمنى
ويدلنى
على أول السكة الأمان
ويمد ايده الطيبة
لكفوف ايديا المرعوشين
ويشدنى فوق السنين
واطلع لفوق جنب السحاب
واكتب كتابى ع الأمل
وانسى العذاب
والإغتراب
وأبدأ أتمتم بالكلام
معنى السلام
وارسم بحرفى المعتبر
فوق شفة الحزن المدجج بالألم
لوحة إبتسام
وارسم بشعرى المنتصر
على جيش من البوم اللعين
فى معركة سحر البيان
صورة حمام
طاير يوزع ع البشر
حُب وغرام
وحبوب أمل
متوزعة
فوق ريش جناحه المبتهٍج
يمكن ف يوم
تقدر تداوى اللى انحصر
بين الخطر والإكتئاب
لسه القصيدة بتتولد
من بين دموع قلبى الحزين
وأنا بين نارين
أختار لبنتى إسمها
وارسم لها صورة حصان
فوق ظهره فارس محترم
وف ايده سيف الميمنه
واكتب عليه .. اسمى أنا
وللا أعود
ويا التاريخ خطوة لورا
وأبقى أبو جهل الغبى
وادفن حبيبتى ف التراب
وارجع أعيش
مع كاس نبيذى المعتبر
واعبد حجر
وانسى القصيدة وأمها
ف البوتقات والمختبر
ودموع ليلاتى بتشتكى
ظلم البشر
جهل انتشر
لسة القصيدة بتتولد
والدبابات والطيارت
حوالين قصور المملكه
مستنظره
لحظة ميلاد بنتى أنا
فرع السعادة اللى ابتدى
يطرح أمل
نور الصباح اللى ابتدى
يطرح سُبل
فاس النبوة اللى إشتهت
تقتل هُبل
لسة القصيدة بتتولد
وده كان يا دوب
عنوان خبر
*******************
رضا أبوالغيط
