مسابقة همسة – دورة الفنان عبدالرحمن ابوزهرة
نوع القصيدة: شعر عامي
اسم القصيدة: لسه حاسس إني عيل
(لسه حاسس إنى عيل)
لما أشوف مرجيحة أفرح
لما أشوف مصاصة أريل
لما أشوف القسوة أنسى
ويا تيارها وبميل
وأنسى نفسى فى برد طوبة
والمطر ما كان قليل
أنسى نفسى ويا صاحبى
تيجى أمى تقولى يلا..
يلا يا ابنى الليل يليل
وأما أروح فى النوم أعبى
لما أروح فى النوم أكيّل
يا زمان وبسرعة يجرى
يدهس العمر الجميل
قاسى ما بتحفظ جميل
ويا حنطورك تكربح
والحصان نازل صهيل
طب ثوانى راح أفكر
لما ثعلب كان له ديل
لف بينا ألف لفة
قالوا فينا أحلى جيل
جيل بيربط فى الدوبارة
ويا طيارة وتميل
سمكة والغماز و شطى
ولّا تقالها الثقيل
ولاّ كورة من الشراب
لفة فوق اللفة تيل
أما جيل…
يقرا ميكى يحب بوجى
ويا رَجل المستحيل
بس لسة حاسس إنى..
لسة عيل فى إبتدائى
شنطة الهموم فى ظهرى
لقمة ناشفة فيها ألاقى
فيها صفحة مرة تمدح
فيها صفحة كات هجائى
ف الصفوف واقف وأحازى
والفّرح قل ومجازى
مد ثنى وتمارين
شخطة م الزمن الحزين
دق جرس الفسحة دقة
باقى لسة حصتين
حصة التاريخ وفاكرة
موقعة لشرابى اللى…
قطعه طلّع لى صباعين
فجأة دوخت م اللى فات
نادوا إسمى مرتين
كشف فيه الدرجات
للى العايش واللى مات
شنطة وقعت م الايدين
فيها ماض و ذكريات
قمت من نومى الطويل
من زمان وبسرعة فات
ولّا صوت أصحاب تقولى..
شنطتك ع الارض واقعة
يلّا شيل فى الشنطة شيل
دا كتابنا و أصله فيها..
الكتاب كان اسمه دين
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
