يوم رحيلك
كان رحيل
كل الحاجات
كل شئ كان حى فيا
لما موتى هوا مات
صدقينى لما اقولك
انى حتى ماعدش فيا
حته من غير ذكريات
صدقينى لما اقولك
انى نفسى فى لحظه واحده
تيجى بس من اللى فات
ايوا اشوفك
وابتسامتك ماشيه فوقنا
تحمى روحنا م العياط
الرباط.الرباط
اتفك يامه
كل واحد راح لذات
كل واحد فينا يامه
فى حته مات
صدقينى
كان وجودك شئ مهم
حبل سبحه كان بيلم
يعنى لما نحب نضحك
ويا مين
والا نبكى طب هنبكى
فى حجر مين
وانتى كل الناس
ياامى الطيبين
يوم رحيلك
كان بجد يوم حزين
الحيطان فى البيت بتبكى
شوق واكتر م الحنين
بس عارفه
لما اجيلك عند قبرك
القى روحى والقى قلبى
زيى برضه فرحانين
يوم رحيلك صعب جدا
مين يصلى بس بينا
والا يدن
مين يعلمنا السجود
مين يعدينا المحن
والا السدود
مين وقلبه زى قلبك
كان براح
كان بيلضم فى الامانى
بخيط جراح
كان يطبطب عالوجع
بالرضا وحبة سماح
يوم رحيلك .بعدها
كل شئ اصبح
متاح ……..
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
