ط
مسابقة الشعر العامى

قصيدة : لما شوفت الدنيا صح . مسابقة الشعر العامي بقلم / محمد عبد المنعم عبد الحليم

Menaem Menaem

خاص بالمسابقة

مسابقة شعر العامية

لما شوفت الدنيا صح

اكتشفت إنى عبيط

ده اللي حاضر فيها غايب

وان وجعى واى جرح

سهل جدا مش مميت

دنيا اعجب م العجايب

…………………………….

شوفت ناس تنزف انين

والليالى والسنين

جاية ليه دايما عليهم

والدموع دى جت منين

ياما فيكى مجروحين

ايه يا دنيا حسى بيهم

……………………………..

شوفت ندل وكام خسيس

واللى تمنه خلاص رخيص

ف الحياة ابن الاصول

شوفت ميت زى عايش

الف جرح فيه وحايش

الدموع رافض يقول

………………………………

شوفت ناس قاعدة تدوس

ع اللى طيب والنفوس

ليه خلاص مبقتش سالكة

شوفت عالم ما اعرفوش

شوفت ناس ما بيرحموش

شياطين عاملين ملايكة

………………………

شوفت نفسى زى طيف

شكلى صعب كان مخيف

الف حلم وحلم ضايع

شوفت قسوة شوفت حيرة

شوفت ناس لسة اسيرة

للجنيه وللمطامع

……………………………….

كل حاجة شايفها نقمة

جرح دمع عذاب عواصف

ولا فيها حاجة تحلى

واكتشفت انى فى نعمة

وان عمرى ما كنت شايف

فى الحياة الصورة كاملة

…………………………….

محمد عبد المنعم عبد الحليم

القاهرة

مصر

01001343146

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى