الإسم سماح محمد خليفة
البلد مصر
الفئة شعر العامية
الصفحة بإسم الشاعرة سماح خليفة
لينك الصفحة
النص 
لو تسمحي
________
لسـه يـا أمـي بتقـري عينـي وتعطفي
قبل الكـلام بتحسي بيا وتعرفي
مهما العيون حَبت ف يوم منك تـزوغ
وتطبطبـي فتروح همومي وتختفـي
واقفة في حلمي تدفعي عمرك شموع
عكاز بيسـند خطوتي لحظة وقوع
وبكلمتيـن بتزوقي ضـي النهـار
يصحى الأمل ويهز وياه الفروع
طول الزمان قلبك دا بلسم للجروح
بحر الحنان في حضرته أنطق وابوح
وارتاح على شطه الجميل ساعة صفا
حاسس براح جايلي مداه من أحلى روح
حُبك جميل يا مؤمنة حُب بخشوع
تِرقي كأني ف حالة نادرة م الخضوع
قلبي أحسه اتقلب عصفور صغير
بيطير ويرسى جوا قلبك في الضلوع
ديمـًا بتدّي والحنان لسـاه عفي
كل المشاعر تحت طوعك تحتفي
يا جنتي .. لـو تسمحي وتتعطّفي
دعوة رضا تسعدلي قلبي واكتفي
