لو في مرة حد سأك عن زمان اوعي لحظة تغلطي تقولي عاشقني الا لما تسبقيها بلفظ كان قبل اي كلمة منك تنطقيها قولي كان قولي كنت انا دنيته كنت الوحيدة قولي كان يكتب في حبي كل يوم عشرين قصيدة قولي كان شايفني حلم شايفني نجمة في السما منورة لكن بعيدة بس انا سقيته الهوان قولي كان قولي كان بيشوف بعيني قولي كنت انا الامل كان عشان خاطري يخاطر يرمي روحه في المخاطر يعمل اللي ما يتعمل قولي علشاني احتمل المذلة والاهانة وبرضه هان قولي كان *********** وابقي لو حاولوا يلوموكي ويقولولك ليه كده سبتيه يضيع ؟ ابقي اهربي من سؤالهم ابقي غيري في الكلام كلميهم ع الربيع أو قوليلهم اصل انا بحب القساوة في الرجال وهو كان طيب وديع ولا اقولك اكدبي وقولي جيان المهم تقولي كان ولو لقيتي كدبتك ظهرت عليكي اقلبي وش الشريط واحكي كام موقف مفبرك اظهر انا فيهم عبيط طلعي في قلبي العبر وازرعي في جسمي الابر وانك انتي سمعتي عن شكلي الوحش مليون خبر وانهم بيقولوا عني بخيل حويط وقلبي خالي من الحنان المهم تقولي كان ************** بس لو قلبك صحي وخفتي الامي او لمحتي قصادي عينيكي قصيدة واحدة من كلامي ابقي داري الدمعتين وقولي بالصوت الحزين احنا الاتنين كنا فعلا عاشقين وبعدنا ده حكم الزمان المهم اوعي تنسي تقولي كان محسن محمد عبد الوهاب رقم الفون و الواتس اب ٠١١٢٣٣٩٥٠٤٠ خاص بمسابقة مهرجان همسة الدولي للأدب والفنون الدورة العاشرة ٢٠٢٢ جمهورية مصر العربية
