متعلق ما بين حدين
حد بطول الليل المشبوك بالعتمة
وحد مالوش على الخارطة بلاد ثابتة
شكلك بقيت بتخاف من اللمة
من النظرة فى عينين ساكتة
من الفرحة من الضمة
كأنك شفت فى الضحكة طربق عتمة
كأنك كنت متشعلق بضى الشيش
لكنه مافيش
عشان ساكن فى أحلامك علامة طيش
بتتخاتق مع الحكمة وعين العقل
بتتمنى يطيش عقلك كما الدراويش
لكنك لسه متفرق مابين حدين
ومتعلق كما نقطة مابين سطرين
مابين البين ولحظة قرب صبابة
ليالى الحزن غلابة
بتتكوع فى مجرى الروح
بتلضم جرح بيعافر
مابين الصمت متعلق وبين البوح
مابين حدين على خريطة لسفينة نوح
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
