(مُتلازمة جرح)
” الأَوِّلة “
ضَمَّد جِراحك ولاّ عِيش بهدُوء
..دا الجرح فينا بيهدِم اللَذَات
” الثَانية “
عَزِّي فِ فُؤَادك اللي مَات مَحرُوق
فَ الحب نارُه بتقتل الدَّقَات
” الثَالثة “
الدَمع كان سِجِّيل ..
والخَبطَة وِسط الرُوح
ما زِلتْ ببكي وصُوتي مش طَالع
كان قلبُه عايز ڤيلَّا من قلبي
وأنا قلبي أصلًا ساكن الشارع
مسكين وكان يحلم يطولُه فِ يوم
فَتَّح فَشَاف الجَرح قُدَّامُه
ياللي انتَ قلبك أَصلُه كان جَارح
عَايش تَمَلي فِ عِند أَوهَامُه
الحُب طَيِّب لِلي يعمل بِيه
والكُره لَايق عَ اللي بِيخُونُوا
قَدِّمت قلبي لأجل تِفرَح بِيه
واتهَد مِنك وانتَ مَاتصُونُُه
لمْ يبدُ حُبَّك إنّه ليّا فِ يوم
غَمِّيت حَقيقتَك قُلت أَنكِرهَا
قَدِّمت وِدِّي قُولت رَابِط حُب
جَايِز حَقيقتُه المُرَّة يِعدِلهَا
قَدِّمت صَدَّك واتحَايِلت عَليك
تِسمَع لِقَلبِي وقُلت مَاسْمَعشِي
فرَّغت قلبي من سِوَاك يا حَبيب
كَسَّرت فِيّا وقُولت مَعلشِي !!
هَتفِيد بإيه الكِلمَة تِتقَال لِي
وأنا إبن جَرحِي جَيّ من قلبي
مَاقدَرش زَيّك إنّي أَجنِي عليه
مَقدَرش زَيّك أَرضَىٰ ليه ذِلّة
بِكفَاية وَحدِي ذَليل
أنا عِشْت ضَلمِة رُوح …
فَاقِت سَوَاد الليل
الجَانِي مِين؟؟ الجَرح ولّا انتَ!!
الجَرح كان لَابس سِنين بَاهتَة
أمّا انتَ لَابِس وِش مِش وِشَّك
مَعرُوف بِجَرحَك حتي وبغِشَّك
وانا كُنت بَلبِس وِش مِ الطِيبَة
بَهْدِم فِ عِشِّي وأَبنِي لَك عِشَّك
الحُب خِيط دَايِب ومِش نَافِع
والطَاقَة خِلصِت والسنين بتمُر
الحُب إِبرَة لَو تِطُول العُمْر
مِن غُرزَة وَاحدَة والحَيَاة هَتفِر
ياللي انتَ بَايِع قَلبِي عَلِّي السِعر
مَتبِيعش بَخسَاً واِحسِب الدَقَّات
دِلوقت بَندِب حَظِّي بَس بِجَهْر
وَاقِف بَقَاسِي والحَيَاة سَكرات
مَاعرفش عَايِش ولّا مُتْ بِقَهْر
ولاّ دا حِلْم انا فيه مع الأَموَات
امنيه وليد سعيد عبدالهادي
