قصيدة : محدش ناقص .. للشاعر / حلمي قاسم

صعب تقابل

حـــــــد يحبك ويكون قابل

إنه يشـــــاركك كل مشاكلك

ما تستغربش وبص لشكلك

تلقي همــــوم الدنيا بحالها

جايبه عيالها و جايه تشاكلك

طبعك عجز وانت شباب

قلبك شاب

وبقيت تشبه ظرف جواب

جوه كتاب

فـــــوق الرف وحيد متساب

مين له نفس يجيبه ويقرا

بعد ما ينفخ كيلو تراب ؟!!

……….

صعب تلاقى مكانك باقى

وقطر الصحبه هيستناك

وإنت هناك

لسه ســـواقى العيشه المره

دايرة وراك

محدش ناقص

لــو بالزائد او بالنـــاقص

يسمع منك قـــــــــولت آه

كل اللى انت شايفهم زيك

بس الفرق الواحــــد فيهم

شـــــايل قـــولت آه جواه

فمتشكيش الهم لغيرك

جايز غيرك همه تقيل

وقت ما تشكي يرد يقولك

شوف لنا حد معانا يشيل