الاسم / محمود عبدالستار فرغلي حسن
اسم الشهره/ محمود زناتي
من مصر محافظة أسيوط
لينك الصفحه
https://www.facebook.com/profile.php?id=100004252845810&mibextid=ZbWKwL
المشاركة في الشعر العامي
قصيدة بعنوان ( مشهد مسرح )
محمود زناتي
#مشهد_مسرح
بلاتوه واسع …
مشهد شارع …
وعامود النور …
بيحاول يلقط انفاسه
واقف مكسور
مخنوق كشافه وبيعارك في ناموس الليل
رغم إنه عليل !!
بيأدي الدور
– ف بتكشف بقعت نور صفره
عن شخص وحيد
مزروع من بدري مابين أكياس الأكل المرمية
تحت العواميد
– مع نور خافت يبتدأ العرض
من غير كلمات مشهد صامت
من غير حركات بيتوه السرد
ويأثر أكتر في الجمهور
وبطلنا هناك واقف مكسور
ف تخش موسيقى بصوت البرد
وكورال بيجسد أوجاعه
على لحن حزين
الجوع بيراود في كرامته
على فعل مشين
يتبع العرض ~~
– على أعلى المسرح من فوق
مشهد آخر
للقمر الدامي المخنوق
بيعافر ويعارك في الغيم
اللي بيرسم على وشه الهم
المشهد مش ناقص تعتيم
غير بس ان الجمهور يهتم
ف تخش الدنيا بقسوتها
صلب الموضوع
وتراهن على جسمه الموجوع
إحساس الجوع
أصعب م السم
– وبدون إحساس
يتنازل عن عزة نفسه
ف بينهش أكتر في الأكياس
والبرد رصاص .. بيقطع فيه
تنزل دمعه تشبه للدم
الدم بينزل ع المسرح
و بيرسم ظل
على هيئة أشباح ممدوده
ويطول الكل
ف بيدخل صوت لموسيقى مخيفه
وإحساس رعب
ع الناحيه التانيه من المسرح
كان واقف كلب
بيراقب في المشهد ف سكون
متعود ياكل م الاكياس
ومجاش في دماغه في مره ظنون
ان يقاسمه ف عشاه الناس
شغال بيجز على سنانه
مش لاقي الحل
بيشوف في صاحبنا الانسان
غاصب محتل
ف بيعلن من جواه الحرب
من بعد معاركه وشد وجذب
إرتضوا باللقمه المقسومه
متعاصه بذل
– وفي لحظة ود
تختفي أنوار البلاتوه
يحتار الجمهور ويتوه
هايسقف ولا هايستنى
ولا هايخبي عينيه ف الارض
ومابين الحيره اللي محوطاه
وإحساس بالأه
تندلى ستارة أخر العرض
تندلى ستارة أخر العرض
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
