قصيدة .مشهد موت .مسابقة الشعر العامى بقلم / أميمة محمد على .مصر

اميمة محمد علي
جمهورية مصر العربية
(اسم الشهرة (اميمة سلطان
قصيدة عامية
مشهد موت
…………..
لا كان صوت الطيور تغريد
ولا ف العيد .. زهور طارحه
مافيش إلا طيور جارحه
وصوت مبحوح
وشوك ممتد
مافيش عصافير بتتسابق
ولا فراشات تبوس الورد
مافيش إلا الدموع فيضان
ولو لمست جبال تتهد
عجوزه مكوّمه ع الأرض
بتبكي ضناها جوّه تابوت
ده مشهد من مشاهد موت
بيحصل كل كام ثانيه
يا قدس يا شمعه مطفيّه
يا سوريا يا يُتم للأولاد
دموع الأقصى فوق بغداد
وجف العلم ف الكوفه
يا نظرة غِل مكشوفه
على وشوش كل آل صهيون
صلاح سيفه اللي كان مسنون
وصل لحفيد جبان صدّى
عجوزه بدمع تتوضّا
وحاكم ف الملاهي سكير
تعالوا لحصة التعبير
وهاتوا م التاريخ نبذه
ياجوز منكم يقوم تلميذ
تشدّه مظاهر العِزه
ف يسكب خمرة اللذّة
ويشرب خمرة الأبطال
ياجوز يصرخ كما الزلزال
ويرفع راية الأمّه
ف تطلع سوريا م الغُمه
ودجله يبوس خدود بغداد
ساعتها ح ترجع الأعياد
وتولع شمعة الأقصى
تنوّر …
ضحكة الأولاد

بقلم،،،أميمة سلطان