قصيدة : مش مهم .. مسابقة الشعر العامي بقلم / محمد صالح محمد

مافيش ع الأرض شيء بيدوم

ولا حزنك دمار للكون

نهاية كل شيء محتوم

وربك أمره كن فيكون

وليه بتحس مش قادر

وليه بتعيش غريب معزول

مسير اليأس حيغادر

مسير الشدة يوم حتزول

مش معنى إن السقا مات

يبقى تعطش أو تجوع

خلي حزنك من سكات

أوعى تنزل يوم دموع

ذكرياتك أمنياتك

كل دا حيتوه ف لحظة

حتى لو أنهيت حياتك

كل الدنيا مش ملاحظة

كنت عايش وهم هايش

سوره أعلى من الجبال

حلم كان مكسور وبايش

فك إيدك م الحبال

كان أمل وحباله دايبة

عشت متشعلق وخايف

والحقيقة شمس غايبة

عن عنيك والكل عارف

نسيوا حتى ينبهوك

كله كان مشغول بحاله

إختفيت عنهم نسوك

مش مهم طب وماله

وقت جرحك وانكسارك

حد قالك إنت فين

وف نجاحك كله زارك

وافتكر عشرة سنين

إبتسم لما تقابلهم

وارتحل من غير عتاب

حتى وانت مش قابلهم

إعتبرهم ملح داب

عشت عمرك دور بريء

بس قلبك بوصلة بايظة

كل ما تختار طريق

تفتكر بنهايته جايزة

عيش بنفسك ويا نفسك

حد نافسك قوله عادي

مش حيفرق عندي وصفك

كنت صاحبي أو معادي

دنيا رابطة نفوس وسايقة

دايرة بينا رايحة جاية

ساعة رايقة ويوم مضايقة

يوم ما تلعب بيك شوية

روح ساعتها ف أي حتة

عيش لوحدك تستجم

أصل كلمة هي هي

زي كلمة مش مهم

مش مهم . . .