مصري ومصرك ومصر كل الناس
شعر دكتور/ محمد صلاح غانم
مصر القويه قويه بعيالها
مش بالتاريخ والمنظرة والكلام
بكره اللي جاي حقيقة مش أحلام
هيه كده مايجيبها إلا رجالها
……
مصر العظيمه عظيمه لجل الناس
لجل البنات والولاد رايحين مدارسهم
فاتحين بيبان الأمل صفحه ف كراريسهم
ضل العلم ف الحوش بالحضن بايسهم
زي الملايكه بيلعنوا الوسواس
…..
مصر الجنود اللي ياما ضحوا بالملايين
مصر العلوم والفنون والعدرا والأزهر
مصر الإيدين اللي دايماً عايشة بتخضر
تغرس سنابل أمل وتعلي وتعمر
مصر اللي في ضلها كل العرب عايشين
…………
مصر الجمال والرسمه والفنان
لوحه أصيلة جميلة مش خيالية
عناصرها بتشكل جداريه
منقوشة جوة القلب والنية
والمعجزه إنها صالحه لكل زمان
…..
مصر اللي طول عمرها بتضحي لجل الغير
في الشرق شط الخليج يشهد على العمال
وآدي إمتداد النيل بيمسي ع الأبطال
في الغرب عند المحيط حواديت كتير تتقال
مصر اللي من قلبها عمالة توهب خير
……….
مجد العروبة إتبنى بأيادي مصرية
ناس عايشة تبني طوبة فوق طوبة
شايلين حمول العرب أقدار ومكتوبة
يا فرحة الحب جوة القلب منصوبة
بسمة رضا بالود متحنية
…….
مصر الدوا والشفا والطبطبة والأمان
يا قعدة المصطبة بعد الشقا راحة
كباية الشاي ولحظة صدق وصراحة
وضحكة صافية وبسيطة ونية مرتاحة
مصر الطيابة في كل حين وأوان
……..
مصر الرغيف اللي طعمه مستحيل تنساه
يا مصري لفيت بلاد الدنيا واتغربت
شفت العجب في البلاد شرقت أو غربت
وبعد توهة سنين بعد الحنين قربت
لقيتها فاردة دراعاتها وحضنها فاتحاه
………
أجدع بنات في الدنيا مصريات
البنت من دول بميت راجل في وقت الجد
سند وضهر لابوها وأخوها وإبنها والجد
صاينة شرف جوزها وفاهمة في الأصول والحد
وف وصف رقتها ممكن تتكتب روايات
……….
مصر التراب والبشر والحب والإخلاص
ضليله بتضلل علي الدنيا
حضن الدفا بينز حنيه
مصرك ومصري ومصر كل الناس
…….
دكتور/ محمد صلاح غانم
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
