أنا مش مكانك، وانت مش في مكاني،
لكن حبيبي… كُلِّنا بنعاني.
فبلاش نزيد البَلّة طين.
يووووه…
شوفت؟
آديك لخبطتني!
كان قصدي أقول:
ما بلاش نزيد الطين دموع،
وبلاش نِزوَّد في الحمول على بعض.
يا تكون سند …
يا تسيبني اعمَّر قِسمتي مِـ الْأرض
ما بقيتش قادر اعيش معاك،
ولحالي أحلى لي …
يا فِكر أصبح مِـ التعب بالي،
كَقُمَاشة كانت يوم قميص مِضلَّع مُنسَدِل
على واد شياكة مْعطّرة،
مكوية بدل المرّة مية، كأنها
مُذنب في قول ألفين قضية.
حُكمهم.. يِفْضَل يِجَرَّب في الجحيم ويدوقُه.
يا بيَّاعين العقل …
فين خلاص..! ما انفضّ سوقه..
وبقينا نجري في الحياة ندوَّر عليه
وما نلحقوش
خايف أقول لك
إن كل الجري دا
فاشوش…
في الفاضي يعني..
لو فقدت فْـ يوم غايتها،
دنيا فانية يا صاحبي… منفاتة وفايتها.
فاحسب لها خطوتك قبل ما تخطّيها،
هتروح يمين ولّا اللي في شمالك شاقطها.
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
