من صغري كبير
************
مع اني فقير
والرزق بجيبه بمنقار طير
بااحلم وبحب لأهلي الخير
وبشوف النور ف طبق بنور
حوالين البيت ف الفجر يطير
مليان احساس وبحب الناس
وتملي انا بااحلم بالتغير
من صغري كبير
وبصاحب ناس بعقول وضمير
من ذنبي بااتوب وباافصل توب
طاهر وما فيهشه اي عيوب
اوحتي أثار غدر وتدمير
وبسد الجوع
ببواقي رغيف معجون بدموع
علي ناس بتجوع مش لاقيه شعير
قلبها محروق
مش قادره تفوق وتبص لفوق
والأمر خطير
مع اني فقير
وبعاني كتير
حرفي المغلوب جوه المكتوب
مكتوب له يدوب ف كاسات الآه
وساعات بيتوه وساعات بألقاه
طاير مبسوط زى العصافير
من غير جناحات وحاجات وحاجات
بااكتب للناس دواوين تنوير
تبقي القناديل ف ظلام الليل
ودليل حيران غرقان ف البير
من ظلم اخوات صبيان وبنات
عقلها مبتور ….وبقلب ضرير
ع الناس بتدوس. وأذها غموس
دايما تحشيه ف قلوب الغير
من غير احساس
من غير تفكير
وتملي تغير من توب دمور
مع انها لابسه هدوم كشمير !!!!!!
مع اني فقير
راضي ومبسوط
بخيوط الشعر اللي بتدلي ف نص الليل
وتقيد لي شموع ف ربوع الخير
وبطير مبسوط فوق فرع التوت
لو حرفي يكون للكون قنديل
وسنابل قمح بتهوى كفوف
مشتاقه تملي لحضن الغيط
ولساقيه تدور من غير مواتير
مع اني فقير
باافرح بجنون
لو حرفي يكون لبلادي العيش
وتقيد له كانون وأفران البيت
وتشيله مشنة ف حضن فقير
باافرح بجنون
لو حرفي يكون اوراق التوت
يهواه القز
ويصنع منه أغلي خيوط
لابني الكتكوت
علشان ما يفوت من شبح الموت
وينام علي فَرشة خيوطها حرير
مع اني فقير
والرزق بجيبه بمنقار طير
مخلص وبحب لمصر الخير
****************************
رضا ابو الغيط
