من غير ما تستأذني شدي الرحال وامشي
وبعد ما تخرجي ردي البيبان بشويش
الحُر راجل عليه واحده ماتحكمشي
والقلب بيكي ومن غيرك اكيد بيعيش
ولو مفيش في الوجود غيرك ميلزمنيش
ولو في ايدك مصيري … الموت يكون اكرم
ولو في قُربك خلاصي امشي ومتحكمنيش
وخلاص باقول لك حياتي في البعاد ارحم
قدمت ليكي الورود زاهيه ومبروكه
قدمتي ليا الوجع والهم والأحزان
وبتنسي ريحه الورود وتبصي في الشوكه
وتقولي ما قولتيه بالظلم والبهتان
وانا في عز المحن صابر على اللي كان
ماشي ف طريقي مصاحب حزني وهمومي
ولما باتعب باقول خليك ياواد انسان
ولما يومي يعاندني باسلمه لنومي
وباحوّش الحزن جوه القلب وباخبيه
واكسر في نفسي وباين صلب قدامك
والدمع رغم الوجع عنك قوام باداريه
واهد نفسي واحاول ابني احلامك
أما انتي وقت الطوفان ع العايمه بتعومي
وتدوسي من فوق جراحي وعايزه استحمل
وان صوتي يوم ارتفع الاقيقي بتلومي
وتقولي إشرب كاساتك م العذاب كَمِّل
المر ليا لوحده والعسل ليكي
الحزن مكتوب لقلبي والفَرَح ليكي
معاليكي ليه في اليسر بتاخدي مبتديش
والعسر ليه من نصيبي بأمر معاليكي
والمر ليا لوحدي والعسل ليكي
اخر كلامي باقول انسيني وارتاحي
وردي باب الوجع وكفاية ما جرى لي
وكفايه حزني وهمي وألمي وجراحي
وخسرت بيكي اماني وفرحتي وحالي
كام ألف مره باقول ان الحياه مُره
والقلب مش حمل حاجه تهد فيه وتزيل
كام ألف مره معاكي تسلم الجره
والقلب شايل ومتحمل وجع بالكيل
وف كل مره باقول اثبت مفيش داعي
وف كل يوم معركه وانا الوحيد مهزوم
وانتي في عز الوجع لا تحسي ولا تراعي
ولا حتى بتقدري وتفرحيني ف يوم
نفد رصيد السكوت وصوتي بقى عالي
سدي ودانك كما عادتك متهتميش
اخر كلامي لجنابك …. الوجع غالي
كُفي اديكي وفي جراحي بلاش تَنبيش
وياريت في يوم الوداع شدي الرحال وامشي
وبعد ما تخرجي ردي البيبان بشويش
الحُر راجل عليه حُرمه ماتحكمشي
والقلب بيكي ومن اكيد بيعيش
القلب بيكي ومن غيرك اكيد بيعيش
