أنا بكتب من وحي عنيكي ف الساعه ديوان
إلهام الشعر ده بعديكي زي الدخان
فبلاش تدي غيابك فرصة يوصل لفراق
إن جه الفراق بتتقفل كل الببان
عارف إني بعيد عن تفكيرك وف قلبك شخص
بس اللي يفارق حور زيك ويبيع بالرخص
والله ده حد ما يستاهل منك بقيان
ليه زارعة الود ف ناس بايعة ولا فيها حنين
ونسيتي سنين من ناس ضاعت علشان توصلك
وتكوني القمرة لعتمتهم..
ويلاقوا ف قربك فرحتهم..
وتكوني عوض بعد الحرمان
لو حاطة فروق بينا شيليها..
الحب أمان
وقلوب بتكمل بعضيها
وحياه لو هحكي ف تفاصيلها تعزف ألحان
بنزف من قلقي عليكي جراح وقت غيابك
وأسألني وأقول على فين راحت
وازاي بس ف بُعدي إرتاحت
وبشوفك جاية بيطمن قلبي الحيران
بيبان إللي ف قلبي عليا لو جت سيرتك
وقصاد صورتك..
يغلبني الشوق وعيني تدمع
والصرخة إللي ف قلبي تسمع إصحاب وجيران
يا ملاك ونازلي من الجنة
قولي ليه بتذلي إللي إستنى
ولحد ما راح لون الحنة
من كفه وشمعه بقى مطفّي
ملقاش جواكي لحبه مكان
كان عشمي إنك تبقي ف صفي
واهو قلبي وعشمي معاكي إتخان
حبيتك حب ملوش آخر
أنا حد ف بعدك م الدنيا ومن كل العالم بقى ساخر
مش عايز حد يكلمني بتجاهل كله وبتاخر
والقلب إللي كسرته بحبك لافه بكتمان
أنا شوفت حاجات بعد غيابك مش ف الحسبان
مغلوب على أمري ومش قادر
وكإنك حد ملوش تاني وف قلب الكون ده فريد نادر
ده إن حكمه عليا إني أجيبلك مهرك وغوايشك ف لوادر
وأجيبلك يوم ما اتقدملك واجب يتوزع ف شوادر
ده بعلم الناس إن مهيتي..
يادوب بتمن حقنة لعيان
لو هاخد من جسمي وأجيبلك
مش هبقى قليل قدامك لو أياً كان
بس إنتي قوليها وطاوعيني
وأنا مش طماع
إشتري مرة
ده أنا ليا تلت مرات بتباع
شربت معاكي الويل كله وعذاب أنواع
خانات الشوق إللي ف قلبي مليتيها وداع
وإن قربت قيراط منك
ألاقيكي بعدتي أوام فدان
يعاتب ناس قالوا ف بعدك إنت الكسبان
مصانتش الإيد إللي إتمدت
ولا حست روح ليها إتشدت على أيه زعلان
أيوة إللي إتخلت وإتعلت بوجودها ف يوم جوه حياتك
حقيقي غباء إنك تزعل على وحدة إستدنت ف ميزاتك
وبقالها سنين عارفة بحبك ولا حاولت تستشعر ذاتك
وإن حد سألها ف يوم عنك لا ترد بعين ولا بلسان
وإن سألك عنها إللي سألها..
بتقوله دي هيا الإدمان
لو قابلة الموضوع م الأول مكنتش هتبعد وتسيبك
كانت هتشوف فيك الخير وتغطي بخيرك على عيبك
وإن عارض حد إنها تبقى من بخت جنابك ونصيبك
كانت هتحارب علشانك وكلامها ف حقك هيجيبك
أمادي مفيش حاجه عليها لحبك بتبان
شوف غيرها وريح أعصابك..
كلها نسوان
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
