من ٣٩ يوم تقريبا
اتغير حاله
بقى هادى وشارد
شادد كل ستاير الدنيا قدام عينه
وعشان مايصعب يومه عليه
طير كل العصافير من قفصه الصدرى
وبعد ما كان بيخاف م البحر
عمل الحزن محارة وسكن فيها
وفتح أخر درج ف قلبه
خرج كل أسامى أصحابه
عدى عليهم واحد ..واحد
وفرد ترابيزة الذكرى
رص عليها الضحكة الصافية
والقلب الخالى
وصورة قديمة لأب وأم
وبنت الهوا لاعب ضفايرها
ف أخر الصورة واحد يشبه له
بس بيضحك
ولما سألنى بلهفة غريبة
هو الواحد بيحس بلحظة موته
قبليها بأد ايه
مااعرفتش أرد
ديوان ( سراديب الروح) ٢٠١٤
