قصيدة .موتة هاتكمل بالرقص مسابقة الشعر العامى بقلم / محمد خليفة

محمد خليفة

[email protected]
01211799719

قصيدة..

موتَة_هتكتمل_بالرقص

أنا مش نبي علشان ماخافش النار
وماليش حمام يُحرُس لي باب الغار
بيني وبين صبري من الأسوار
مايكفي إنِّي أنهِزم بسلام
خايف ..
واظنّْ الكلمة دي كفاية
تِوصف شعور الرعب جوايا
وتدارى سَوءِة قلبي م الأيام ..
أصرخ تموت من صرختي الأحلام
فاجري وراها مولَّع القناديل
أدفن مشاعري كل أوِّل يوم
واخُد عزاها لما ييجي الليل
رغم اني عارف اني وقت ما اموت
هيقولوا نستنَّى لحد الصبح
على مايلاقولي تُربة على قدي
على قد عقلي اللي انتصر لما
كان كل يوم ينصحني وانا ماسْمعش
وانا كنت ماشي بـ كُلِّي ورا قلبي
دلوقتي كُلِّي بينتفض في النَعش ..

سامع صويت وخناق وقسمة ورث
ودا كنز أغلى كتير من المادة
سهل التناول بين إيدين الناس
علشان كده هينَطوَروه بينهم
خايف ألاقي حروفي متشحططة
على ضهر ورقة شايلها أي طريق
ينداس عليها بالجزم بالقصد
وانا كل ورقة فيها من روحي ..
عشمان ألاقي حد يدعيلي
لو عَجَبه سطر كتبته قاله لحد
أنا كنت سامعك لما نبِّهتني
آسف يارب اللعبة قَلبِت جد ..
لو كنت أعرف قسوة الدنيا
كنت انشغلت بآخرتى أولَى
دلوقتي ضاعت فرصتي على ناس
دخلت حياتي كأنها مقاولة
بيراهنوا بعض ويكسبوا خسارتي
إحترت بين النِيَّة والنِيَّة
ففهمت لما باعولي تذكرتي ..
ودَفَعت غَصب تَمَنها ضِعف الضِّعف
رغم انها لأمثالي بالمجان
_ يُمهِل ولا يُهمِل _ ودا مش ضَعف
ربك سايبهم يسرقوا الأكفان
وانا مش هاكون جُثَّة في كفن مسروق..
نادوا النسيم يرقص هنا جنبي
مش عايز ادخل قبري وانا مخنوق
مش عايز اسمع بعد قفل الباب
خاف نار جهنم بس مات محروق ..