ناصر .... ..... ... مشهد اول .. كرباج على ضهر الفقير وما فيش مع الكرابيج سماح لكن خلاص البدلة كاكى والجميع كتفا سلاح زهرة شباب النيل هنا بيشدوا م الليل الصباح ارفع دماغك ياوطن وبلاش تسلم للجراح ابنك جمال ويا الرجال من بعد ليل الانكسار رافعين اذان على المأذنة بيقولوا .حى على الفلاح بيقولوا حى على الكفاح مشهد تانى . الارض مش للاغنيا والشعب مش حبة عبيد الملك لله الصمد والارض خيرها لكل ايد صوت الفقير اللى انكسر دلوقتى بيرج الحديد برد الغيطان اصبح دفا مع طلعة الفجر الجديد صوت العدالة اللى اختفت رجعت هنا والشمس باست ارضنا من نورها داب جبل الجليد مشهد تالت .. صوت القنابل والمدافع والبارود صوت خلا كل الناس بقت جيش ع الحدود. ارض القنال من بورسعيد لما السويس ارض البطولة والرجولة والصمود امم قنالنا يازعيم واحنا معاك د احنا الكرامة اللى مايوم تخشى الحشود امم قنالنا يازعيم واحنا معاك وان مات شهيد ف المعركة الصحرا رح تولد اسود مشهد رابع. . ارجع مكانك يابطل وياك بروحنا مكملين يا نخلة النيل العظيم يابركة من راس الحسين ارجع مكانك يابطل وامسح دموعك م العنين لسة الجنود ف المعركة لسة الزناد تحت الادين ارجع عشان مصر الهرم وعشان ولادها الطيبين النكسة مش اخرالمطاف دى بداية النصرالمبين اخر مشهد .. صوت السواقى صار بكا والنخل فوق الارض مال طعم المرار ف الحلق زاد ونحيب ف اصوات الرجال من كل حتة نعش فات وف كل بيت صورة جمال مات الزعيم مات البطل مات اللى كان شايل جبل وف صوته كل الامال مات الزعيم لكن اكيد جوة القلوب عايش جمال جوة القلوب عايش جمال #محمد ابو العبادى#
