” نبأي العاجل”
العالَم على شَفا شئ حاصل
وأهو يوم عن يوم بيزيد زَنُّه
والعمر صَبَح مُهلِك جدآ
والبني آدم بيخاف منُّه
حتى الإنسان بقى زي آلة
بقى ماشي يدوس لأضعَف مِنُّه
والكون مترَصَّد للأيام
جاهز ب إيدية ونابُّه و سِنُّه ..
وآدي حلمي خلاص ما بقاش حلمي
بقى أَتَبي اللي بَ أشِدُّه ورايا
والقلب اللي سنين صان وجعي
فاض وجعي وزاد بقى بَرَّايا
في حروب بتدور جوة ف روحي
وهزايم كَفِّتني و فايضة
وفي كون بيدُور وأنا مش لاحق
أسعى لأهداف عاندة معايا ..
واقف ف مدار تاية وحدي
مربوط ف سواقي بتِمْزَعني
مَعرفتي ب خلق الله تمآ
مخاليق وثواني توَدّعني
معرفتش أكوننّي و أقرب ناس
على أبسط حاجة بتوجَعني
معرفتش أحبِك يوم ب ضمير
علشان الخوف بيِرَجَعني ..
روحي اللي الحزن أكلها سنين
وماسابش مناب للناس مِنُّه
قلبي اللي إتشَق ف قلب الليل
ولا لاَقى شعور خَفِّف عنُّه
والله أنا أبسَط م اللي إتشاف
أو م اللي إتقال أوقات عَنُّه
مَمسوك من إيد الدنيا بقيت
في صراع وضلوعي بيِتَّنّنُوا ..
الساقية أهي دارت والأيام
مربوطة ف حبل قطار فالت
من هَم أصحاب على هَم أقراب
على هَم حاجات فوقي ومالت
بَدفَع فواتير ل سنين قُدام
تاية عايش بَجْهَل سِني
وزماني بيجبِر روحي تعيش
حمّالة هموم يوم ما إتقالت ..
مهزوم دايمآ ف حروب الناس
مهزوم دايمآ ف حروب حالي
مش عادي ، أقل كمان بكتير
ومفيش ولا نَصر بيبقالي
زي ما يكون متفقين الكون
والعالم والناس والأيام
إن أنا راح أشيل الهم سنين
وأضعاف أضعاف عمري الحالي ..
ب أحتار أختار وقراري ملوش
غير لازمة ف عالم أفكاري
مرفوض م الناس مرفوض م الكون
مرفوض م الأهل ومن داري
ثَبَتولي الفكرة ب إني مليش/
ولا لازمة ف كون داير دوني
” كُتر التأنيب” وَلِّد إنسان
مش هَتحبية ولا تحتاري ..
أنا حَزن بقيت ماشي ف هِدمة
حبة أفكار سِكْتت ماتت
دوستين ف خطاوي ف أرض هناك
ماسابتش آثار ، صمتآ فاتت
والنبأ العاجل إني بقيت
بَعشق يومياً صَبَّارِك
علشان الشوك دة ماكانش آلام/
دي دموع من قلبي ف يوم سالت ..
#هند_حسوب
#نبأي_العاجل
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
