اقفل ودان حضرتك
وافتح لي قلبك بس
ماهو في كلام يتسمع
وفي كلام يتحس
الدنيا فيها العجب
أشكال على ألوان
فيها اللي يوزن دهب
و كتير كما الدبان
في ست وش الخير
وست وشها نحس
بختك ياعم بخيت
بطيخة مقفولة
ياتعيش سعيد مرتاح
وتقيم ليالي ملاح
يا إما فجأة تعيش
مع امنا الغولة
قصة ومنقولة
من عهد أجدادنا
شوبش وحلق حوش
سامحونا يا اسيادنا
ستاتنا كانوا زمان
ورود تزين بساتين
وشعور سلاسل دهب
وحَمار على الخدين
دلوقتي شفط ونفخ
وحقن بالكولاجين
رموش بقت تركيب
وفرد بالبروتين
تغسل يادوب وشها
تلقاها عم أمين
فتقول بلاش الشكل
خلينا ف المضمون
تبان في غاية العقل
كلام جميل موزون
تقع قوام ف الفخ
لسانها سيف مسنون
لو يوم ملكت المال
هتعيش سعيد راضي
تفضل تدلع فيك
وتهني وتدادي
وتقول قصاد الناس
متجوزة طرزان
جدع وابن اصول
وف حضنه بر أمان
تخلص فلوس حضرتك
تفرش ملايتها
تلعن كمان عشرتك
تشكيك لصاحبتها
ويدوب يفوت كام يوم
مذلة منها وقهر
تآخد لقب مرحوم
وتكون فى حضن القبر
وآدي اللي يوم نابك
بقينا مش فارقين
اقفل بقا بابك
هتشيل لوحدك طين
نصيحة مني أنا
حوا ماليها أمان
احذر تآخد رأيها
حكمة وقالوها زمان
تجيب جنابك ورا
مشورة النسوان
___________________
وفاء_ علي
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
