شعر عاميه قصيده عن الفراق بعنوان(هاتلي الشاي بدون سكر)
انتِ عالم جوا عالم
كل ناسه قلوبها شابت
وانتِ قلبك لسه طفل
وانا كنت قفل
لما سبتك
كنت فاكر هبقى عادي لو خسرتك
بس لما بتيجي سيرتك
بلقى نَفسي نِفسي اشوفك
ببقى عايزك ترجعيلي فارجعيلي
صعب عارف تغفريلي بس حاولي تغفريلي
خلي نوم يبقى نوم واشتياقي مش سموم
جوا روحي كل مبتهدا تقوم
وقت لما الليل يليّل
ايوه عارف ان ذني مش قليل
كنت عيل
لما كنت ببقى جمبك
ما انتِ ذنبك برضو كنتِ مقوياني
كنتِ زايده في الحنان
شوفتي دلوقت بعاني
من حياتي وانتِ مش موجوده فيها
كل واحد راح مكان
كل واحد شافله قصه بس لسه
قلبي برضو بيناديكِ هو ليه هاين عليكِ؟
ليه مصره تعذبيني؟ اسمعيني
انتِ برضو مشتقالي لسه باجي كتير في بالك
حتى لو بتبينيلي انك انتِ بتكرهيني
لسه حالك هو حالك
بنت مبتعرفش تكره مهما قسيوا الناس عليها
بنت اصبح كل همي بس اني ابقى ليها
ترضى عني او تبصلي بعنيها
شوفي حالي فين جمالي الي كنتِ بتعشقيه
راح معاكي حتى روحي برضو راحت
قلبي ميت ريحته فاحت
كنت جاحد
كنت فاكرك مش هتمشي بس خيبتي ظنوني
كل يوم بيزيد جنوني
بقيت بنادي ف الشوارع
يالي سامع
هاتلي الفرح من تاني
عشان الحزن غطاني
وهاتلي الشاي بدون سكر
عشان الحلو في غيابها هيصبح مر
وهاتلي الناي عشان صوته
بيشبه حزني في فراقها في كل دقيقه بتمر
وعشان الورد يشبهها
في كل شوارع الدنيا هنزرع ورد
وياريت تكتبلي على بابها
انا والله ما كنت في يوم حمل البعد
فاتوا سنين وانا بعدك هحن لمين
بحن بس للقاكِ
بقيت ناقص بقيت فارغ
مكنش ماليني إلاكِ
بعد الوقت بالثنيه وبتعدي الثنيه في سنين
بقيت ببص لمرايتي وبسألها انا مين؟
شايفني ضعيف كأني شايفيني من جوا
ضعيف كأن الدنيا سلبتني العافيه والقوه
مهشم بس مستني تطلي عليه
عشان ترجع قوته فيه
يا منبع قوتي وحيلي
مفيش ولا حاجه تشفعلي
واستاهل اكتر من الي بيحصلي
لاكن لسه في شيئ جوايا بيقولي
انك ممكن تحنيلي
فانا طمعان في فرصه كمان
اصلح فيها المكسور
انا عارف مفيش مكسور بيتصلح
ودي آخر فرصه لو ينفع
واقسملك بحق فرقتك عني
هكونلك زي ما تحبي
مش هسيبك تبقي زعلانه
ولا ندمانه لقرارك
هكونلك زي مُختارك
مش هترك شيئ يأكدلك
باني بقيت واحد تاني ومعملهوش
هكون الشخص الي اتمنيتِ تلاقيه فيا ومالقيتهوش
فشوفي ايه الي يرضيكِ
وانا عيني وقلبي لعنيكِ
ويكفيكِ
بأني شربت مر الفراق
بدال الكاسات اطنان
والفضل يرجعلك
حقك بقى رجعلك
وعملتي شيئ يشهد عليه الكون
ويمكن حاجه هتفيدك
قلبي الي كان فرعون
اصبح موسى على ايدك
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
