قصيدتي الجديدة
هو فاضل فيها ايه
هي فاضل فيها ايه
لما تبقى الدنيا غابه
والقلوب صبحت قوية
لما تنهشنا الديابة
لما يبقى الدم ميه
يبقى فاضل فيها ايه
**********************
لما اخ يعض اخوه
لما ابن يبيع في ابوه
لما يبقى الكلب اوفي
من اللي شبعوا وجوعوه
يبقى فاضل فيها ايه
*******************
لما تبكي على اللي قهرك
تلقى خنجر جوه ضهرك
مين هيدفع يابني مهرك
أو يدور يوم عليه
يبقى فاضل فيها ايه
*********************
مين ياعم يداوي جرحك
أو هيجي في يوم يصالحك
أكلوا عيشك قبل ملحك
وانت بتدور عليه
يبقى فاضل فيها ايه
***********************
داالزمان بنلوم عليه
واحنا اوحش حاجه فيه
اللي ياكل حتى جلدك
واللي بيعك بايديه
يبقى فاضل فيها ايه
**********************
من النهاردة انا هبقي ناسي
مش هحط الناس في راسي
مهما بعمل أو بقاسي
بيقولولي عملت ايه
يبقى فاضل فيه ايه
يبقى فاضل فيها ايه
