قصيدة (ورحمة تجوز) مسابقة الشعر العامى بقلم / د.أحمد رجب النمر

الاسم : د.أحمد رجب النمر
التليفون : 01069678128
البلد : جمهورية مصر العربية _ المنوفية
الفرع : شعر العامية
القصيدة : ورحمة تجوز

و رحمة تجوز
على الكافر بكل العشق
لو سالك ف غير دربك
و ع الخاين
لتاء العشق مربوطة
بجدران قلب غير قلبك
و رحمة تجوز على السارق
ورود العشق يصنعها
تيجان موصولة بالطرحة
تزين روحه بالفرحة
ف حضن الدنيا و ينولها
بنول ودك
و ع القاطع طريق الشوق
عشان يِوصِل
جناين حبك الطارح
زهور الفل على جيدك
و من إيدك
يلامس نجمة بتنور
بلون خدك
و رحمة تجوز على المكسور
بعتمة ليله من غيرك
و يتمنى بصيص نورك
يصد العند من قلبك
يدوق الهجر و يردك
يفرّح روحه بالطلة
يبات مجبور
و رحمة تجوز على الغرقان
في بحر العشق لعيونك
و مفتونك
لا لاقي القشة من رمشك
و لا لاقى ف يوم شطك
فيتمنى يموت فيكي
يموت ليكي
و يطلب رحمة على روحه
يا ريتها تجوز
يا ريتها تجوز