ط
مسابقة الشعر العامى

قصيدة : وصية مكتوبه . مسابقة الشعر العامي بقلم / أحمد هلال

( وصية مكتوبه )
___________

أمانه عليكو
سيبو الفرح متعشم خطاوي الناس
ولو ممكن تبيعو الضحك بالتقسيط
وإن أمكن
أمانه سبونا نستقبل مصير غامض
بفتحة نفس
بلاش تجيبولنا سيرة الموت
دي شهقة بتجرح الانفاس
ووالله الحياه اهون من إن نعيشها خوف ورا خوف
تفاصيل الوجع قتاله يا ابن القلب
في ناس احلامها بس في لقمه تملا الجوف
انا مش طالب إني اعيش
ولا عاوز اموت كافر
أنا قلبي اللي بيعافر
عشان بس اتخلق له مكان
فمش طالب يكون له مقام
وقصر وحضره ولا دراويش
دا عجزي مداري أحلامه بفتحة شيش
مافيش غير انه يتعشا
ويفتح رجله يتمشا
وحتة بيت
ولو ممكن قصاد الناس يبان بيعيش
ولو امكن …
بلاش احسن
سبولي قصيده مكسوره وقلم وغلاف
وعنوان لسه بره السور
وضحكه بعيد عن التسعيره والتجار
وقلب يكون له بس دليل
أمانه سيبوني بالتفصيل أعيش لهوايا وهواكم
في مركب كلها أوضه
وجدار بايش وسقف جريد
وعمر سنانه مكسوره ..
مع الضحكه اللي بهتانه وياخساره
بلاش كل اما اقابل حد من الأحباب
تكون الكلمه ..كفاره
ياساده وصيه مكتوبه بخيط الإيد
عليها الختم والعنوان
أنا المذكور تعيس الحظ بكتبها
ولو بحسبها والله
ماكنت شقيت
ولا حبيت
ولا اتشقلبت بلياتشو بحرف كئيب
أمانه عليكو
لو كان الضمير صاحي
تبيعو الفرح بالتقسيط
ولو أمكن سيبولنا الضحكه بالمجان

بقلمي ( احمد هلال )

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى