وقع الحصان غرقان ف دمه
غريب ف ساحة المعركه
كان مات أبوة
وأتقتلت أمه
الحرب دايره
وفايره…
والجثث طايره
مين دول؟
ومين اللي جاب دول هنا؟
ومين اللي خللي الفصول
ربيع يخش ف خريف
وصيف يخش ف شتا
الأمه متشتته
والحصان غرقان ف دمه
والامه زى العار
له ريحه
طايشه
وسخنه
وجريحه
لكنها….وسط النهار
أمه تدارى الفضيحه
بصوت ٱدان
بحج بيت الله
بهدم ف الأركان
لكن بعون الله
الجنه داخلينها
وحجزنا بلكونه
بجمله واحده
(لا اله الا الله)
سيدنا النبي….
شايف عياطى السخن
وهدومى اللي متقطعه من الريح
والبرد داخل بيحجل
زى سنجاب جعان
بص ع الدكان
فاضى …والرف متعفر
والراديو بيصفر
وعيالي ف الدار
مستنين اللقمه حاف
ودراعى مقطوعه
من مدها للغريب
سيدى الرسول
أمتك لصوص
وسكرانين
حشاشين
بيعشقوا الغلمان
بيرصوا ف النسوان
بيقتلوا بعضهم
عشان الهيلمان
بيغشوا
بينصبوا
بيكدبوا
بيقطعوا الارحام
بيدهسوا الأرامل
بيمرمطوا الايتام
بس الزبيبة بخير
والدقن مش سنه
الدقن دى عيره
وكله بالتسعيره
دقن الوزير
دقن الغفير
دقن المدير
والمرتشي
دقن تجار البلاد
دقن الاوغاد
والقوادين
سماسره الأمم
شماشرجية البلاط
سيدى النبي
أمتك….جهله
وغلاظ القلب
سيدى النبي واقف لوحدى وسط القصور
عصفور ضعيف وسط النسور
عريان
وسط مليون (عثمان)
مظلوم ومعلم الكرباج ف جسمى
(عمر مات)
وحدانى كر وفر
أنا….(وأبو ذر)
الوطن صار حكر
الدهب حكر
الارض حكر
تحتها حكر
خيراتها حكر
البحر صار حكر
والهوا حكر
مات سيدنا (ابوبكر)
سيدى النبي
أتهزم في أمتك خير
وانتصر الشر
سيدى النبي
شايف غضب سيدى عمر
شايف ابو بكر الحزين
شايف جبينك م الحقيقة
استشاط إزاى غضب
بس دول أمتك
دول اللى حاجزين جنه بلكونه
وب..لا اله الا الله
كراسيهم مضمونه
دول….
أكبر عصابه دين
علي مر التاريخ
سيدى النبي…
موجوع وجع..قد المحبه
الصدق
والرحمه
قد كلمه نبي
ف المشهد الزحمه
سيدى الرسول
يامنبع الرحمه
مفيش رحمه
ومفيش سلام
وانا……..
لمحبتك خدام
وانا…….
بسألك سؤال كبير
عن مسلمين دينك الاسلام؟!
فين الحلال
اذا كان وكل ماحواليا ف بلاد دينك العظيم
حرام!!!!
