ونتمنّى
……..
وبتقول لي ..كفانا بعاد
كفانا عناد
كفانا سكوت
يكون ردي بتنهيده
يرج صداها ف الملكوت
تطبطب بالحنان كتفي
تملّس لي حرير شعري
تبص ف عيني وتقول لي
يا مجنونه .. بحبك موت
وييجي ربيعنا شجرة توت
وعطر الورد يحضنّا
نحس بروحنا ف الجنه
ونتمنى
ف تربط حبل ف الشجره
وترفعني كما الطفله
تمرجحني بإيد الشوق
تغيب الشمس نستنّى
عشان بكره ح ييجي شروق
تعود الشمس تجمعنا
نعيد الكرّه من تاني
تقول لي حبيبتي وحشاني
ف نخطف م الزمن تخاطيف
وييجي الصيف
نلاقي النسمه عصريه
ف نتمشى على الكورنيش
ونتمايل ف لحظة طيش
يهل علينا ليل بشويش
ونتسامر
علىى ضحكة عمود النور
وموج يعكس نجوم بنّور
يزيد إحساسنا جوّانا
عيون الدنيا عشقانا
وقلب الوقت نبضه ضعيف
يهل خريف
ف تسند خطوتي إيدك
ويسند خطوتك عكاز
نشوف الصوره ف البرواز
ونتذكّر حاجات فاتت
هنا الضحكه اللي يوم عاشت
وكانت باينه جوّه العين
هنا البنت اللي بضفرتين
بتمشي .. الأرض تتزلزل
هنا كنا بنحكي كتير
ومهما الوقت يسرقنا
بنقعد برضه نسترسل
شتا ينزل
مطر فوق الوشوش يغسل
عيون الكحل والماكياج
يبان العمر ف الإنعاش
وتظهر ع الوشوش تجاعيد
خلاص عدّى زمان العيد
وغول الموت محاصرنا
ف نمسك نبضنا بإيدنا
ونستنى
ياجوز ييجي الربيع تاني
يرجعنا .. لأول سطر
بقلم أميمة سلطان
