يادنيا مدي إيدك
إمسحي دمعة وليدك
إمحي من صدره الأهات
وبالفرح زيدي رصيدك
في قلوب المهمومات
يادنيا طبطبي علينا
وم الحزن اللي مالينا
إرحمينا
وإحتوينا
وإمسحي الدمع ف عنينا
وكحليهم بالضحكات
يادنيا بلاش تعيدي
الماضي بذكرياته
خففي صدمات آلامه
خففي صرخات آهاته
وإمحي كل الذكريات
إفتحي صفحه جديده
فيها الحياه سعيده
من غير هموم وآهات
ومدي ….
مدي إيدك يادنيا
إمسحي نزف الأنين
ضمدي جروحنا
بمداد حب وحنين
يادنيا خليكي دايما إيد
رفيقه لكل وحيد
وتعالي نبدأ
تعالي نبدأ من جديد
وإمحي من قلوبنا الصديد
إللي تقيح . من قسوة الحديد
يادنيا لفي مودك
لأجل مانفرح بوجودك
بكفايه قسوه وحرمان
عايزين نعيش فيكي
دايما بحب وأمان
نفرح بوجودك
معانا في كل مكان
يادنيا مدي إيدك
إمسحي كل الآهات
بالفرح زيدي رصيدك
في قلوب المهمومات
إمنحي قلوب ماتت
من تاني نبض الحياه
إمنحي قلوب ماتت
من تاني نبض الحياه
صفاء عبد ربه
