قصيدة ( ياريتنى )
ياريتنى كنت
عصاية أو عكاز
تسند إيديكى
ف أخر الأيام
وأوهب عيونى
ومش هيبقوا عزاز
وأغطى راسك
من شقايا وأنام
ياريتنى كنت توب
بلون العمر
يستر جروح الدنيا
قدامك
ياريتنى كنت صوت
وضله وفجر
وبراح
يعوض حزن أحلامك
ياريتنى كنت لسان
أقول للشمس
حنى عليها
وكفاياها جروح
خبى شعاعك
حتى لو بالهمس
مين اللى يسند
لما هيه تروح
ياريتنى كنت معاكى
ف المشوار
أسند بقلبى
ضهرك المكسور
وأشيل معاكى الشيلة
كل نهار
وأكون ف وسط العتمة
حبة نور
ياريتنى كنت وريد
أو شريان
مرسوم ف قلبك
صوته صوت الدم
أسمع دعا وتنهيد
أقول للزمان
بزيادة فيها الوجع
وشيل الهم
ياريتنى كنت سحاب
معاكى تطير
تاخدك بعيد للفرحة
زى الطيف
وتودعى أيام
مخاصمة الخير
وأرض مبتعرفش
إلا الزيف
ياريتنى كنت
عصاية أو عكاز
تسند إيديكى
ف أخر الأيام
وأوهب عيونى
ومش هيبقوا عزاز
وأغطى راسك
من شقايا وأنام
# شريف أنيس
فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
