يا أم العيال
**********
ماتزعليش يا ام العيال
لو حظي مال
وماتلوميش
كتفي اللي شال عنك هموم
تُقل الجبال
كفياكي لوم
وبلاش دموع تحرق قلوع
سفن المحبة والوصال
أنا قلبي مش ناقص هموم
فوق اللي فيه
ولا خدي ناقص دمع تاني
يهد فيه
ولا جرحي عاد مستني حد
يحس بيه
والإيد بقت
محروجة جدا م السؤال
يا ام العيال
خفي العتاب الليل طويل
وبلاش مناهدة أو عويل
د الهم لو زاد ع اللزوم
بيكون تقيل
وكلامي واقع مش خيال
فبلاش تلومي
ع اللي شاب حلمه الجميل
قدام عينيه
واختار يضحي بالطموح
علشان يدور ع الجنيه
وسط المدافع والرمال
يا ام العيال
خفي الكلام
انا قلبي مش ناقص ألام
ولا حتى مستحمل ملام
وبلاش يكون بينا انفعال
كتر انفعالك والغضب
قادر يحطم كل شيئ
حتى المبادئ والأمال
وارجوكي اهدي واسمعي
مني المثل ده وافهميه
وبلاش مقاوحة أو جدال
يا ام العيال
الرزق عارف سكته
وسط الصحاري والجبال
والحال دوامه من المحال
**********************
رضا أبو الغيط
