قصيدة : يا أم الهرم و النيل .مسابقة الشعر العامي بقلم / أشرف عبد الرحيم ناصر

الاسم/أشرف عبد الرحيم ناصر
اسم الشهرة /شاعر الجبل
جمهورية مصر العربية
فئة الشعر/ شعر العامية
رقم الهاتف و الواتس
01025223300
رابط الصفحة على الفيس بوك
https://www.facebook.com/share/14oCy8HQQp/

أسم القصيدة
( يا أم الهرم و النيل )
كل اللي قالوا الشعر لعيون الملوك
عاشوا ..
و انا عايز أموت
معرفش اقول الشعر فعيونه و اغشُّه
و ان جيت أقول ..
قلمي يقول للي اتخذق عينه: يا اعور في وشه
بعرف أقول الشعر فـ الغربة وفي طول السفر
و اعرف أقول الشعر في ليل السهر
و اعرف أقول الشعر لعيون القمر بلدي
بلدي وبلدي و بلدي
يا ضل شجر التوت
يا جنِّة الملكوت
يا نقش على صدر التابوت ..
و لمِّة المخاليق .. و براح البيوت
يا قبضة النبوت فـ أيدين الفتوة
الواد اللي هوه
يحمي الحارة و الحرافيش
زنهار… كزمار الشويش في وقت الجد
يحمي الجيرة م السطو و الملاطيش
يعرف يصد .. و يقوي العتد و العد
و يرد ع الألضيش
يخبز رغيف العيش و يسد جوع الخلق
يطبق فـ حلق السبع لو يقرب منابه
يفتح كتابه بيمانه .. و يدوب يفك الخط
يشيل ويحط في حمل الغلابة حط
يحمي الحيطان و البيبان م النط و الهجامة
حافظ مقامه .. واعي لكلامه
حامي لزمامه .. حامل لجام الصهوة م التزييف
حامي كحد السيف ..
عارف تمامه ازاي و امتى وكيف
بلدي اللي غزلت كل الطوائف طيف
هدت حصون برليف
وقفت ولا تهزت
بلدي اللي يوم جزِّت على سنانها
ردِّت كلاب الليل
بلدي يا هبة النيل وصهل الخيل
و الصبح في عيون العباد بيغنِّي بالمواويل
يبدر بذور الحلم ويجمع المحاصيل
أم الحارات الطيبة وخان الخليل
أم التكية و السبيل
والقلب أبيض جلي
وجذبة الدراويش ومدد يا سيدنا الولي
أم السمار المخملي
بلدي اللي يدخلها في سلام و أمان
كما قال العلي
بلدي اللي معرفها ولا شافها
يقرا بداية الخلق
م الأولي
بلدي و بلدي و بلدي
يا ام الهرم و النيل
نفسك طويل
صبرك جميل محلاه
من فات قديمه تاه ..
دا أنا قلبي لما ناداه نيلك .. قوام لبى
يا مصر يا شابة
صوتك أدان ع المدنة و القبة
و أنا حبة حبة ..
ماشي بصحِّي فــ النايمين
مسنود بكتف الطيبين
ولا عمري مرة أخاف
مصر اللي شبعت م الهموم فوق الكتاف
جمعت ما بين السنبلات الخضر و السبع العجاف
مصر اللي يسمع أسمها غير اللي شاف
هي التاريخ اللي أنكتب و الجي مكتوبها
هي اللي رغم المِحَن ما غيَّرت توبها
طوبها وريحة طميها معجون بمية ورد
مصر البهية فـ السلام وأبية وقت الحرب
مصر الصدى فـ القلب فرح وكرب
هي اللي لو جاها عدو هتثور عليه الأرض
مصر الوطن مصر الشرف و العرض
مصر اللي حب الخلق ليها م السنن
وحفظ ترابها هو الفرض
مصر اللي أهلها في رباط باقي ليوم العرض
مصر اللي أهلها في رباط باقي ليوم العرض
…………………………………………………………..
أشرف عبد الرحيم