الاسم / مصطفى كرم
الشهرة / مصطفى كرم
البلد / جمهورية مصر العربية ـ محافظة المنيا
نوع المشاركة / شعر عامية
عنوان المشاركة / يعني ايه كلمة وطن
**** يعني أيه كلمة وطن ****
تلميذي جاني ف يوم سألني
أستاذي فيه معني مجنني
يعني ايه كلمة وطن
يا ريت ألاقي رد و تقنعني
فكرت حبة جوه مني
والحيرة جوايا تشاغلني
رديت بسرعة غصب عني
يعني أرض طارحـة جواها فرحة
ونظرة شارحة بعيون ولاد
يعني جار يصون ولا بيخون
وصدره حنون كله وداد
يعني لمة عيلة في الضليلة
و حـكاوي جميلة ويا السهاد
يعني وجوہ شقيانةوأيد عرقانة
تزرع خير وعليها ينعاد
يعني ايه كلمة وطن
يعني ابن عنود راح ع الحـدود
وأم بتدعي بالسلامة يعود
و هو حـالفَ ما يرجع ليها
غير بالحنة أو بكفه ورود
يعني آيه كلمة وطن
عن حضن دافي للامان
وسند حقيقي م الزمان
هو دا معني الوطن
بص لي بصة عجب
و وشة م الغيظ اتقلب
و صرخته ملات السكون
طب هو فين حضن العرب
ازاي شايفنا نستلب
واخويا محروق باللهب
والود ما عاد له مكان
والأرض منا بتغتصب
كل يوم ألفين شهيد
جحيم يقول هل من مزيد
والام تبكي بالدموع
تشيع وليد واللا حفيد
سكت لساني عن الكلام
أزاي أرد علي الغلام
وكل حروفه في الصميم
مش لاقي فيها غير الملام
طب أعلمه ازاي الإنتماء
ويكون مخلص عنده ولاء
وهو ما شاف غير المصالح
والأخوة دي شعار ورياء
الله يرحم معتصماه
واللا صلاح والناس في حماه
ماتت فينا حتى النخوة
وعلى العرب عوضنا على الله
