قصيدة : َعلى قدي .. للشاعر / محمد زهران

َعلى قدي

بعيش فيها على قدي

وعيشي و ملحي من كدي

واجوع وامرض وأتعافي

ممدش للقريب يدي

على قدي

كفيني حبة م الأمتار

أمدد فيهم الجتة

وساعة قديمة بتطقطق

ترن في واحدة وف ستة

تعرفني غروب الشمس ولّا نهار

مفيش عندي شاشات أو نت

دا راديو من زمن صالح

بيقلب بس ع الاخبار

ويطربني بصوت الست

وزيري ميّته سكر

ييضحك بالندي طارح

معبي النيل مع الأمطار

ولبسي جينز كان ازرق

بقى تلجي

بطاقتي ع الحيطان واضحة

لاحول لي ولا قوة

لا قوة لي ولا (حولهْ)

انا مواطن اكيد صالح

لكل حكومة أو دولة

لا عندي جراب ولا أسرار

ما بتكلمش في الممنوع

قميصي سادة مش مطبوع

لحافي خالي م الألوان

واناجي الله واقول مرضى

تضيق تفرج لا بعلن ضيقي

أو رفضي

تضيق تاني، بقول عادي

اكيد فترة وهتعدي

وعلى قدي