حسام حسن ابراهيم الشهرة : حسام الطنوبي جمهورية مصر العربية 01123906102 رابط صفحة الفيس بوك: https://www.facebook.com/share/1DDUcxQTx1/ قصيدة بعنوان: "ڤيتامين زمني" إن جيت عشقت/ اعشق كأنك "صوفي".. ميخافش من حَنَش الفراق يلدغه وإن جيت كرهت/ اكره كأنك "طوفي".. يكرَه سنان البالِغين تُندُغه وزّع مشاعرك ع القلوب مَنابات.. بما إنها.. كده أو كده هتنسَلَب وزّع حياتك في الكفوف صدقات.. واتوصّى باللي مامدّش ايده، وطلب اسقي بضميرك كل شئ عطشان صَوّب خيالك ع المُحال منطَقُه حظك معاند!؛ شوطُه للخسران واما يجيلك.. ما تباصيش/ نَطّقه شُق لحبيبتك جوه عينيك/ بير وارمي بُه أي عيوب، خصوصا إذا.. حسيت في عينها بربكة التبرير بُصلها، حسسها انها معجزة ادّي الحياة ضهرك.. هتجري وراك اجري وراها.. هينقطم ضهرك "عدم الرضا" ضلمة/ اكرُشُه بَرّاك هتشوف في عز الليل جلال ضُهرك وان حد سألك عن طموحك قول.. "يقيني بالله"، والدليل سَعيي أدِّب عينيك بالبَصّ ع المعقول.. ده النَكْش في الغيب كُترِته بتِعيي أنا وأنت فُولة في قشرة الأيام ونصيبنا في سنان الحياة يختلف هنتندغ وفي بطنها هنّام.. وفي النهاية.. هنبقى شيء مُؤتَلِف ايه اللي باقي منّا.. غير سيرة! ڤيتامين في شريان الزمن مدسوس ايه اللي مستنينا غير حيرة.. ع العاصي؛ لكن.. ع اللي طاع "فردوس
