116سنة أهلي واحمر ف احمر لون التفاصيل أحمر ف احمر نبض الثوار دم الشهدا على حيطان الليل 116 سنة أهلي واحنا العشاق طوابير طوابير واقفين على باب الحلم معاه وقلوبنا بتمشي وراه مشاوير من حلم " عمر لطفي " بدأنا واتحققنا وبقينا كتير ..................................... 116 سنة أهلي واحنا الحواديت اللي بتتنتور ع العتبات اللي بتحكيها الجدة ليلاتي لأطفالها و ساعات تضحك وبتبكي ساعات م النور اللي مضوي ف ليلها والفرحة اللي الأهلي سايبها بتاريخُه الحلو ف تفاصيلها من أول نجمة ف افريقيا وهدف ' بيبو " والكاس اللي حلفنا نجيبُه من قلب" كوماسي " بحلم قديم فاكرين فاكرين ولا يوم ننسى يا " صالح يا سليم " يا الأب الروحي اللي مفرق روحُه وأحلامُه على الملايين صورتك مع جايزة نادي القرن ف أفريقيا .. ساكنة الميادين ........................ 116 سنة أهلي واحنا البطولات والانتصارات وجناح النسر اللي بيلمس وش السماوات احنا البراويز اللي بتفرح بيها الجدران احنا اللي بنخطف لون البهجة من الأحزان ونوزع أفراح ع الشارع يتبسم بعد ما كان زعلان إسمنا كان مكتوب ف الطالع قبل الأزمنة بزمان وزمان احنا الأمجاد واسأل " متعب " و " وليد سليمان " احنا اللي ف "رادس " لنا حكايات وستاد " المنزه" يشهد لنا بحاجات وحاجات من ضل" تريكة " بيحضر كاس تتجنن ناس وتعيط ناس 116 سنة أهلي وشعور القاضية بيتصنف أعظم إحساس ........................... 116 سنة أفراح 116سنة إعجاز 116 سنة واحنا مزيكا جميلة وغيرنا نشاز 116 سنة أهلي ومكمل " بيبو "مع الإنجاز
