قصيده: أنا إنسان وهعيش إنسان . مسابقة الشعر العامي بقلم / خالد جلال

أنا مش عايز اكون أوجاعك وإنت مشاكلي

أنا في الأصل إخترتك علشان شكلك شكلي

ليه دلوقتي نسيتي زمان

كنت الحاجه الحلوه عشان

الفسفوسه بتعديها

والحبايه بتعديها

والأوجاع بتدوسي عليها

علشان حاجه بتحبيها

ولا نسيتي

فاكره زمان من غير تفاصيل

حب وعشق ورغي الليل

فاكره الضحكه بدون أسباب

فاكره الشوق بعد غياب

فاكره أنا وإنت كنا أصحاب

كنت أداري في حضنك وأجري

ليه دلوقتي بقينا أغراب

كنت أستني لأخر اليوم

علشان أرجع وأسمع صوتك

كنت بحب يا شيخه سكوتك

كنت بلملم كل ورود الدنيا عشانك

كنت ببوح بمشاكلي لنفسي

واظهر ليكي إن أنا فرحان

أنا غلطان

منا إنسان

دم ولحم وروح بتحس

أنا غلطان

علشان شايفك إنتي وبس

شايفك صوره بدون خلفيه

شايفك ماليه الدنيا عليا

شايفك أحلي كلام أغنيه

بس ذكيه……

أيوه ذكيه عشان طماعه

سايبه الدنيا وباصه لساعه

بوصي ياستي علي المليان

واملي عشاني الجزء الفاضي

وإعمي عنيكي عن الأحزان

أنا مش خالي عيوب ولا هخلا

أنا إنسان وهعيش إنسان