الاسم محمود عبدالله محمدين
القاهره
موبيل 01119622336
قصيدة شعر عاميه
قصيدة بعنوان
(قلب عجوز)
مش كل الشيب فى الوش يبان
عارفه اللى ملامحه بتتكلم وتقول شيبان
اهون بكتير
اهون بكتير من فرع يبان لساه اخضر
والحزن بيعصر فى الشريان
اغصانه بتكبر وبتكبر
لكن منظر
سقياه الدنيا بحوور حرمان
رغم الاوجاع
انا احسن حد يبان فرحان
انا ضل بيتحامى فى ضله
والشمس اساسا مش بتبان
فمتخدعكيش الوان الطيف
انا حد حياته ربيعه خريف
والمطره بتنزل حواليا وف كل مكان
وبتيجى لحدى وتتغندر
ترفض تسقيني وتتكبر
عملتنى جزيره فى وسط البحر
تشوفيها تقولى عليها الله
سبحان من ابدع هالمنظر
من كتر المطره اكيد مروي
من امتى دموع العين تروى؟
ده انا جذرى السابح جوه البحر
بيبات عطشان
وعينيكى تشوف للورد نداه
يتبسم سغرك م المنظر
من غير مايقول
وف لحظة بتلقى أن المشهد
الورد نداه كان بس دموع
صوت الدقات جواه موجوع
والزهرة اللى بتطرح فيا
زهرة ياسمين
ما أنا عينى ابيضت م الاحزان
كل القمصان صابها العجزان
والبير اللى انا ساكن فيه
مكتوبلى عليه
انا فتنه وسحر
كدب وبهتان
وف لحظة اتبدل كفر الناس
بأشد ايمان
ومافيش م الماره واحده عابر
هيفكر يشرب من بيرى
خليكى يا نبضى بعيد احسن
وخلى عصايتك بره البير
ده حبال السحرا فى بيرى كتير
وعصايتك مش قد حبالهم
لا هاتقدر تبطل أفعالهم
ولا تقدر تجمع حزن سنين
ف ازاى عايزاها تشق البير
مش هطلع ولا همسك فيها
ولا هقدر اكون أقوال تفاسير
ولا حتى قميصك هيغير لون الياسمين
ف متتخدعيش
من ريحة السحر
دانا عمرى حزين
والورد الصابح جوايا
صابغ عمرى
وملامحى بترفض وتكابر
والضحكه مابتفارق وشى
اقسم بالله ده كلام كداب
بس مصدق ضحكى وغشى
فبلاش بإيديكى تدقى الباب
مش هاقدر اوهبلك عمرى
وانا نبعى سراب
ولا هاقدر اغزل لك فرحه
من توب كداب
وحياة النبض اللى بيحلم
يحضن نبضك
وانا ف التوهان
وحياة البحر اللى اتمنيته
ياخدنى لحضنك
من غير ما اتهان
وحياة اللحظة اللى اتمنيتها تدوم
وتدوم وأفضل جنبك
لو بالبهتان
بذياده عتاب
ده انا عمرى الاصلى ما هوش عمرى
انا عايش عمرين فوق عمرى
ساقيينى عذاب
وانتى جميله ولسه شباب
وورودك لسه هتتفتح
ارجوكى سيبينى بلاش اسرح
معقوله اكون عاشق م الحور
وقت أما بتصحى وتغنى
الشعر بيبقى جدايل نور
وانا وبينى حب رابونزل
قلعه و١٠٠ سور
ومانيش اللص اللى هيطلع للقلعه لفوق
ياخد بالطاصه على دماغه
ويشوفك يعشق تفاصيلك اول ما يفوق
انا اصلا دايب ف ملامحك
بس جزيرتى بتشرب بور
فازاى هسقيكى الحب كاسات
وازاى هاخدك فوق للنجمه
وانا اصلا ساكن ف الاموات
وعمرى ف لحظة ما هقبل انى
ترجعلى حياتى على ايديكى
فتضحى بكل جدايل شعرك
علشان مسحور
انا راضى بعتمة حرمانى
مستسلم ليها ومأسور
بس انتى تغنى من تانى
وتخلى جدايلك تبدر نور
واكيد هتلاقى فى يوم غيرى
فارس احلام له قلب جسور
والضحكه بتطلع من قلبه
ولحضنك هو اللى يفوز
وسبينى اضمك ف سكوتى
انا راضى بضمه طيف مهزور
انا واحد عمره ف الثلاثين
لكن قلبى يا بنتى عجوز
كلمات محمود عبدالله
