خاص بمسابقة العامية …محمود عبد الرحمن مصر
قلتيلي يابابا
من بعد زمان الملاغيه
وعنيكي بتضحك لعنيه
وكأنك غنوة ف إديه
قلتيلى يابابا
******************
وبقيتي بتحّْبي وتتشاقي
وبتنْتشي ديماً اوراقي
ترقصي على غنوة لحماقي
وتقولي يابابا
*****************
وكبرتي قصادي يا نور عيني
وكأنك عمر بيحكيني
بضفيرة وفستان مدرستك
لايق ومذوق على رسمك
واعاكسك وأدلع اسمك
مكسوفة الفرحة ف ملامحك
وتقولي يا بابا
*****************
قلتيلي يابابا انا عايزة حصان
بيطير وياخدني لأي مكان
منا بحلم زي العصفورة
أحلامي جريئه ومغرورة
وساعات الدمع ما بيفوتني
وانام وانا روحي مكسورة
بفرح وياك لما تبوسني
وتقولي جميله وشطورة
وازعل من خوفك على قلبي
ف عيونك لسه صغيورة
يا ببايا انا بنت 18
وعيوني كحيلة وأمورة
متخافش دروسك جوايا
منقوشة ف قلبي ومحفورة
انا إسمي ساند على إسمك
والأصل بينقش ع الصورة
متخافش يابابا انا بننوتك
وبحب الأصل عن الصورة
قلتيلي يا بابا
واهو جالك فارس احلامك
والفرحة شايفها في كلامك
حسيت بالعمر بيتسرسب
وكان الفجر بقى المغرب
غيران يا حبيبتي لكن فرحان
منا أب وواخد ع الحرمان
ما هي سنة بندفع فواتيرها
بنربي ونزرع من خيرها
اتهني يا روحي وادعيلي
اصبر على بعدك ورحيلي
وقليلى يابابا
محمود عبد الرحمن مصر
