قومى يابلد .مسابقة الشعر العامى بقلم / على العربى من مصر

……قومى يابلد…..خاص بالمسابقه عاميه (مصر)
مات الولد……
ولا الوطن هيموت
غيره هيتولد
وهيمسك النبوت
فتوه على كل ظالم
عفى..على كل جبروت
قومى يابلد وقولى
راح وانتهى وقت السكوت
اللى مات على ترابك
سايب على بابك
اللى لحقك ابدا..
ما هيفوت
والدم اللى بقى
يجرى كما الطوفان
ريه راح يزرع سنابل
خضره وعيدان
وافتح يانيل شلالك
خلى البذره تخضر
لجل يكبر الطرح
ويوقف قدام الشر
مين قال مات الولد؟
كان مات الطرح واسفر
ولدك ياغاليه قوى عوده
بس المواجه..مش الغدر
يطلع ويضرب كما الجبان
خسيس وماله وطن ولابر
عويل..والغدر بقى طبعه
اااااه بس لو للمواجه يتجر
تلاقيه يجرى كما الخيبان
من الخوف وشه يحمر
قومى يابلد ولا تنامى
وبخيوط الحرير..انسجى اكفانى
عطرى قبر الولد
لجل ما يتزف من تانى
مين قال انه مات
ده صلب وعنده جلد
وحسر ه على كل جانى
قومى يابلد قومى
لجل شمسك تصحى كل غفلان
وتحرق كل خاين..عداكى وعادانى
ده مش اصيل ولا حتى
ابن حلال…مين عارف
يمكن يكون ابن….
أياك ياوطن تئن
ولا حتى تقول اه
لوحتى الشر سكاكينه سن
الخوف والرعب جواه
من رصاص ولادك اللى بيزن
فى ودانه ويقطع حشاه
لا صلح ينففع مع الديابه
ده الغدر طبعه والخيانه جواه
رصاصه الاعمى بس للغلابه
ندر عليه حقه ماسيب…
وهجرى وراه….
حتى لو زى العقارب
يلدغ ويندفن فى الرمل
مش هسيبه هنزل معاه..
ودموعك ياما على ولدك
فى رقاب الوطن واللى حماه
بردى ياست الكل نار قلبك
ده شهيدك خد فرحته معاه
لجل ياقابل رب كريم قبلك
عريس والملايكه زفاه..
لحور الجنه يا سعدك
متعطره وقاعده مستنياه..
…..على العربى….