قُبلة حياة …للشاعرة هناء نوار

فِ شارع الحب الكبير
قابلنى قلبه وِسط الزحام
كان له جناحين
مشتاق يطير
كَات سِكّتُه مِسك الخِتام
نَاديت عليه بشويش
من بين كل الناس
نادانى هوَّ بشوق
و بلهفة الإحساس
كانت عنيه متكحّلة
بليلُه الحزين
و تاريخ حياته بتوصفه
و بترسمه خطوط ع الجبين
و لقيت ملامحُه فيها
من عمرى اللى فات
فكرنى بالحب اللى مات
وِسط السكات
مديتلُه ايدى
و كأنى بلمس قوس قزح
شقّيت وريدى
و قسمت قلبي من الفرح
تاهت خُطايا فِ سكّتُه
و كإنى روح
متعلّقة فِ حبل الخلاص
و رسملى بسمة بشِفّتُه
و كإنها للحب كاس
شربت شهد من جوّة شهد
و حلو شهده صحّى الحواس
حسيت بإنى لسة حبدأ سكتى
و تهت فِ عنيه
و انتفضت .. و دق قلبي
و من حنانُه انا دُبت فيه
و لقيتنى بغرق جوة بحر
مالوش قرار
بستنى لحظة لاحتضار
فجأة التقانى
و شدّنى لبحور هواه
كَات ضحكتُه قبلة حياة
أو طوق نجاة
و فرد جناحه وضمِّنى
و طِرت فِ سماه
حلفت إنى لا يوم عشقت
و لا الحياة اللى قبل منه
و عشتها .. كانت حياة