كان انسان”
***********
و كان بيشلنى فــــوق كِتفه
ويفضل ماشى ف الشارع
ومـــاسك ركبتى بكفه
وبيدندن بصوت واطى ماهوش طالع
ولما بنـــــوصل البقال
كان يوقف يلف الشال
ويسألنى اجيب لك ايه؟
وكنت أسبق وارد عليه
جيب لى كازوزه وملبس
وبسكوته عشان افتحها وأغمس
وشــــوف لى بريزه اجيب ترمس
وكان الـــرد ضحكه وحضـــن
وكام بوسه علـــى خــــدى
وملصة ودن …وتعــــدى
ويضرب ايده فــ جيــوبه
ويفتـــــــح زر محفظته
يشاور ع اللى هيجيبه
ويتكلم مع البقال ومن عادته
يقول له سؤال… حداك سكر؟
يلاقى الرد جه ف الحال
حداى اديك ؟….. يرد بضحكه
لا ادعــــى الاله يشفيك
ويتبسم ويضرب كف ويقوله
هتفضل فقرى طول عمرك خفيف الروح
منين ما تروح واخدها هزار
وبتنكت مســـــا ونهار
وبعد ما نشرب الكولا
يعاود بيـــــا ع الخضرى
يلاقى الباميه مبلـــوله
يقوم يرجع قوام دوغرى
يشـــوف غيره ويتسوق
ابُص بعينى ع الفاكهه
يقوم يلمحنى متشوق
يقولى اهدى بقى وروق
وهــات ايدك نروح لهناك
مش ممكن يا نور عينى
فـــ لحظه انســاك!!
ويملى الكيس من الفاكهه
ويدينى.. يلافينى قبل حتى ما يدوقها
وبعد مــــا ينتهى المشوار
يشيلنى تانى وياخدنى نروح ع الدار
الاقى امى علــــى العتبه
بتستنى وقلقانه على التأخير
ترفع صــــوتها بمعاتبه
شغلتــــونى وخليتوا دماغى تطير
يضحك هو كالعاده ويديها حاجات الســوق
ويطلع فــــوق عشان يرتاح ..ياخدنى معاه
علـــى ســـريره الاقـــى براح …..وانا وياه
ياخدنى فـــ حضنه يحوينى
اروح فــ النـــــــوم يغطينى
ويمسح بايده فــوق راسى
تمّلـــى كان بيحمينــــى
ولا كان لى ف يوم قاسى
……….
وحشنى كتير وانا فاكرك
وجــــوه القلب انا حافرك
ولا عمــــرى هكــــون ناسى
********
قلم/حلمى قاسم
