كان بدى اشوفك . مسابقة الشعر العامى . بقلم / فتح الله محمد صفوت من مصر

***********************
بالعاميَّه لمسابقة مهرجان همة للآداب والفنون
*****************************************
كان بِدِّىِ اشُوُفَك
***************
كان بِدِّى اشوفك
قبْل ما تْغَمَّض عِيِنَيَّه
عارْفَه ظُرُوفَك
حاطَّه على صورتَك إيِدَيَّه
حاجَه مِنْ رِيِحْتَك حبيبِى
حاطَّه مِنْ رِيِحْتَك حبيبِى
حِلْوَه تَسْرِيِحْتَك حبيبِى
شايْفَه ضِحْكَك
حاسَّه طِيِفَك
كان بِدِّى اشوفَك
***************
نايْمَه على نُوُمْتَك باغَنِّى
ويَّا ألْحانَك وصُوُتَك
والسِّكُون فـ الليل شاغَلْنِى
ويَّا تَنْهِيِدِة سِكُوُتَك
ياه طوِيل الليل بِدُونَك
حاسَّه وانا فاكْراك باخُوُنَك
فَرْشِتَك نَظَرات عيُونَك
كاتْبَه شُوقِى
بيِن حُرُوفَك
كان بِدِّى اشوفَك
***************
جِه فـ فكْرِى كِلْمِتِيِن
لمَّا كُنْت معايا مَرَّه
قُوُلْت لِى كان لِيِه وفِيِن
يوم ما شوفْتِك فِيِه فـ سَهْرَه
فاكْرَه يا قلبِى اللى غايب
كان فـ بِيِت أغلَى الحبايب
يُوم خُطُوُبَه م القرايب
لاِبن اخوُك
ودَخَلْت كِيِفَك
كان بِدِّى اشُوفَك
****************
بَعْدَها قُومْت انتَ قايل
للعرِيس الحِلْوَه مِيِن
قال ناوِيِت نِبْقَىَ عَدَايل
قُوُلْت إدْعِىِ وقُول أمِيِن
قُوُلت مِيِت أمِيِن فـ سِرِّىِ
ومِنْ ساعِتْها كَتَمْت سِرِّىِ
وانا واحْدِىِ فَتَشْت سِرِّىِ
لِيِك لصُوُرْتَك
بِيِن حُرُوفَك
كان بِدِّىِ اشُوُفَك
***************
كلمات للشاعر
الأستاذ / فتح الله أبو آيه
عضو نقابة شعراء مصر
الإسم / فتح الله محمد صفوت عبد اللطيف
البلد / مصر