احمد الحديدي
القصيدة
كعوب ساندوتشات
((ياابن الشوارع
لما تلاقى فرخ كرتون على الرصيف
مش كل طعم النوم سراير–
المهم تنام بعمق/ مش نوم خفيف ))
الدنيا ضحكت لك / يا مولود الشقى
خلاص لاقيت شغلانة تغنى عن سؤال
ابن اللئيم
عامل ف مطعم جوه حمام/ آه بقى
يا حظك اللي بيبتسم
ياابن الكئيب / يا “عب عليم”
هتدوق بواقي الأكل م الناس
النُضاف
دا مش بعيد ترمى كعوب الساندوتشات
لأ وتاكل لحمة حاف
((الفرحة لو هتيجى بعد شوقة
هم
الحيرة فى القلب اللي هاجر من ضلوع الناس
نفس السؤال
مافيش جواب
وإيه أهم
إحساسه بالغربة هنا
أو غربة الإحساس ؟))
اليوم دا عيد ميلاد”حماده بيه سعيد”
عيّل لطيف/ وجاي على سبع بنات
محجوز له فى المطعم هنا خمس ساعات
“عبد العليم” / من خرم باب حمامه شايف كل حاجة —
بس مش فاهم ومش حاسس
طب هية ليه العيال سعيدة ؟
ويعنى إيه لعب جديدة ؟
لما الهدايا شيء بيسعد العيال
طب ليه يخبوها ف ورق
ويُربُطوها بالحِبَال ؟!
حمادة طفّى الشمعتين من غير مايتنمى
وتفيد بإيه الأمنيات لحد فى الجنة
حمادة راح يغسل أيديه .. فتح له طبعا “عب عليم”
وعينه جت ف عْنيه
((حلقة مصارعة–
نظرة الحرمان/ في عين طفل الشوارع–
تجرحك وهى طالعة
عشان تواجه
نظرة الطفل اللي زارت عينه دمعة —
نظرة المتمرمطين / كرباج بيلسع —
نظرة المتدلعين / كتير بتخدع —
نظرة اللي اتفرجوا ماتحركوش
هيّ اللي توجع))
