ط
مسابقة الشعر العامى

كلام له معنى ز مسابقة الشعر العامى بقلم / إيمان محمود من مصر


شعر عامية – مسابقة مجلة همسة الدولية
قصيدة ( كلام له معنى ) إيمان محمود من مصر
——————————-
تعرف ترسم صورة
ألوان واضحة مش مكسورة
بسمة أمل في ليل ملل
لمة عيلة في وسط جنينة
ضحكة طفل من غير تكشيرة؟
أيوه ده دورك
قلمك في إيدك
صباحك يغني بكل أناشيدك
بلدنا محتاجة إنسان مش سذاجة
ويمكن بجاحة تقلب قباحة
كلامك غناوي بترسم معاني
تشكل صحاري بخضرة أماني
تخوني حبيدك
قلمك ده سيدك
سلاحك في إيدك
قانونك لجيلك
كلامك مزوق بكام بيت ومفعل
إفتكرت اللي يقرى لابد أنه يفعل
مقالة في جريدة كام سطر فريدة
تقتل طموح كان ممكن يفوح
قصة قصيرة خيالية مريضة
تحرك شجون وشوية أفيون
رواية وداششها فيلم مريشها
وتوكتوك أغانى سممت وداني
نماذج عقيمة
فن بلا قيمة
القلم له هيبة
ريشة مهيبة
تنحت عقول
تحارب جهول
ضميرك ده قيدك
إصحى ليسيبك
ساعتها السواد نغمة مزاد
سلاسل بتقتل مستقبل ولاد
دايرة مخنوقة
حرب منصوبة
تمسح تاريخ وفن تأريخ
عنتر وعبلة ، قيس الجريح
شوقي وماضي
قصبجي ، نياتى
كلثوم ويا فايزة
بحترى وجرير
أبنودى الصعيدي
شادية وفريد ، عبد الوهاب ، فرزدق ، محفوظ النجيب
ومعاهم منيب حماتى تأديب
نجيب الريحاني وعم إسماعيل
وماننسى حليم حالة لجيل فريد
وطني وثوري ، مشاعره عندليب
قلمي مش ساعفني
تاريخي جاي يجري
وأنت يا ابن جيلي
حتفضل عويل
خنجر في الأصيل
عمالة في إيد لئيم
أو يمكن غفالة بتقول أنا شئ جميل
إصحى وفوق أوهامك خانوك
إبني طريق ممهد صديق
تخلق بيوت تنبض وليد
مستقبل حياة ، تاريخ للأمام

admin

فتحى الحصرى كاتب صحفى عمل بالعديد من المجلات الفنية العربية . الشبكة .ألوان . نادين . وصاحب مجلة همسة وناشر صاحب دار همسة للنشر ورئيس مهرجان همسة للآداب والفنون
زر الذهاب إلى الأعلى